Solange Li Engelhardt; Direktora El Consolador

El Consolador ta eksistí 36 aña kaba miéntras ku Solange Li Engelhardt ta na kabes pa basta aña kaba. El a konta ku su tata tabata direktor i for di momentu ku el a keda inougurá na 1988 e tabata huntu ku su tata. Ora su tata a fayesé 11 aña pasá Solange a tuma over i e ta na kabes te awe.

Dia 2 di novèmber awor, esta djasabra próksimo ta dia di ‘Todos los Defuntos’. Un dia ku El Consolador ta rekordá tur esnan ku a bai nos dilanti, un un selebrashon pa famia, amigu i konosínan por partisipá na dje. Solange Li Engelhardt direktora di El Consolador a pone atenshon na e okashon aki.  E ta un selebrashon i den e selebrashon aki nos ta rekordá tur nos sernan kerí ku a bai nos dilanti. E aña aki ta e di tres bia ku El Consolador ta selebrá dia di tur defuntu. Dia di tur defuntu ta unu internashonal selebrá mundialmente riba diferente sistema. Riba e dia aki ta rekordá sernan kerí i den e evento aki lo tin tres pastor ku lo trese nan manera di mira e dia di tur defuntu. Ta tres pastor di diferente denominashon. Nan lo duna palabra di aliento na e famianan na e evento pa pèrdida di nan ser kerí.

Rekordá e ser kerí

No ta solamente un dia pa tristesa pero un dia pa rekordá e sernan kerí. Nos mama, Tata, Amigu ku a bai nos dilanti. I e bishitante lo por spera músika, lo tin tres pastor, lo tin sikólogo kaminda lo trese puntonan kon pa dil ku a bashí ku e ser kerí a laga atras. Esaki lo tuma lugá na Parke El Consolador na Brievengat. Tur hende ta bon biní. Espesialmente nan klientenan ku tin ser kerí derá aki ta bon biní. I e ta un selebrashon ku algu di kome i bebe na e evento aki.

3 aña di selebrashon di dia di tur defuntu

Tirando un bista bèk riba e tres añanan ku ta organisá e evento i tambe tirando un bista riba e dia mes di 2 di novèmber, Solange ta bisa ku nos pueblo ta pone atenshon na dia di tur defuntu. I p’esei mes El Consolador ta organisá e evento pa di 3 aña siguí. Dia nan a kuminsá 3 aña pasá nan a ripará ku riba e dia ei hopi hende ta bishitá santana pa pone un flor, sende un bela. Bo ta ripará ku e ser kerí a bai pero no ta lubid’é. Por mira e atenshon ku e famia ta pone. Mirando e evento 2 aña kaba i e aña aki pa di tres aña nan ta mira kon e hendenan ta sinta dilanti di nan graf ku nan stul, ta bin ku algu di bebe, huntu ku famia dilanti di e graf di nan ser kerí. E bèrdat ta ku bo ser kerí a bai, pero hamas i nunka bo ta lubid’é. Tur dia bo ta kòrda riba bo ser kerí pero dia 2 di novèmber ta un èkstra, un dia spesial.

Ora bo no ta rekordá e hende, e ora ei el a muri

Solange a aklará pa nos ku no ta dia 2 di novèmber so, pero nan a tuma nota ku ta durante di henter aña hende ta bishitá santana i nan ser kerí. E hende a bai pero ta kòrda tur ora riba dje. Kisas ta rekordá e hende e dia ku e lo a hasi aña, òf e fecha ku a der’é. E hendenan ta bishitá nan ser kerí den santana. Solange ta haña e kos ei masha bunita. I manera nan ta bisa, ta ora bo no ta kòrda riba e persona ei mas, ta e ora ei el a muri.

Entiero a bira mas un selebrashon

Teniendo na kuenta 36 aña di eksistensia di El Consolador, Solange a ripará un kambio si den e forma ku entieronan ta tuma lugá. El a bisa ku awor entiero ta un tiki mas selebrashon kompará ku ántes e tabata algu muchu mas serio.  Segun añanan ta pasa por ripará ku morto a bira selebrashon di bida. Tin mas dekorashon, e manera di mira entiero tin un toke otro for di 36 aña pasá. Tambe e ta kere ku tin rèspèt pa entiero.

Entiero segun bo presupuesto

Riba nos pregunta si e ta kere ku nos hendenan ta poniendo atenshon na e preparashonnan pa ora morto kai, esta e parti finansiero entre otro, Solange a bisa ku lamentablemente ainda tin sierto okashon ku un hende no tabata prepará na momentu ku su ser kerí a bai, esta tabata falta seguro di entiero òf fondo un banda poné. Tin bia nan a kuminsá hasié pero sirkunstansia den bida a pone ku nan no a sigui i ora e hende fayesé e seguro no ta bálido mas. I ounke kuantu informashon duna pa ora di momentu di entiero famia no keda ku e doló atras, tòg e hende no ta sufisiente prepará. Entiero bo tin di paga promé ku bo dera. I banda di esaki gastunan di entiero tambe a subi.  Segun Solange, bida kompleto a bira mas karu i sigur despues di covid. Loke semper e ta bisa e kliente ta hasi segun bo forsa i no hasi kompará ku e otro. I dado kaso ta 4500 florin tin ta esei tin i mester hink'é den otro. Entiero ta bai segun loke e kliente ta skohe i a base di su smak. Por skohe un kaha di morto di 1900 florin pero tambe por skohe unu di 6 mil florin.  E pregunta ta kua di nan bo por afòrt. Mester bai segun e presupuesto di e kliente pasobra al final mester dera e persona.

El Consolador tei pa konsolá

I e tarea di El Consolador ta pa guia e famia segun e presupuesto ku e tin pa e por dera su ser kerí a base di loke tin disponibel. Manera e palabra mes ta bisa El Consolador “nos tei pa konsolá bu. Nos ta bai segun bu presupuesto i loke no tin mester simplemente no mester”. I teniendo na kuenta ku 36 aña pasá kompará ku awor tambe por mira ku kremashon di e defuntu a subi. I tin hende ta kere ku komo a krema e defuntu no por rekord’é. Esei segun Solange no ta e kaso pasobra e shinishi semper ta keda. I e famia por skohe un graf pa pone e shinishi, e por karga un tiki shinishi den un kadena i diferente forma mas ku por sigui rekordá e ser kerí. I al final tur kos ta den kurason.

Seguro di entiero

Banda di e selebrashon di dia 2 di novèmber Solange a bisa ku sigur pa preparashon di nos hendenan i konsientisá nan riba entiero, nan ta organisá diferente otro aktividat. Pa kasualidat riba e mesun fecha di 2 di novèmber e aña aki Solange a bisa ku nan tin charlanan. Esaki lo tuma lugá New Song ku informashon pa sigurá bo mes,  trahamentu di tèstamènt ku ta algu ku hende no ta para ketu na dje i e ta evitá ku ta laga famia den problema. Tin hende ainda no tin seguro di entiero i p’esei nan ta hasi charlanan pa konsientisá e hende eifó pa sòru pa tin seguro di entiero. Tin hende ta konfundí seguro di bida i entiero. Esun di entiero ta bo mes ta usa i esun di bida ta esnan ku keda atras ta usa.

Un invitashon pa pueblo kompleto

Solange a invitá pueblo di Kòrsou kompleto pa 2 di novèmber segun tradishon selebrá dia di tur defuntu. E ta kuminsá di 8 or pa 2 or ku diferente orador riba e tópiko i sikólogo pa duna tepnan balioso pa dil ku e bashí ku e defuntu ta laga atras. Lo tin músika, ko'i kome i bebe i un kariño di parti El Consolador. Esaki lo tuma lugá na parke El Consolador na Bonam.