WILLEMSTAD.- E tribunal di Hof ayera a kondena e akusado/ detenido Chavel Waterfort alias “El Diablo”, akusá di ta esun ku a likidá Kenroy “Maná Maná” Stefania na un kastigu di 28 aña di prizòn, despues ku abogado general a hasi un demanda di bida largu pe.
Stefania a keda asesiná dia 30 di yüni 2012 den prizòn blòk 4 e tempu ei “Bon Futuro” na Koraal Specht.
Den korte di promé instansia, Waterfort a keda sentensia na 24 aña di kastigu, despues ku fiskal a pidi bida largu pe. Tantu Ministerio Públiko i Waterfort, a apelá e sentensia. Waterfort a para riba su inosensia, miéntras OM ta eksigí bida largu pa e akusado.
Den e veredikto, e tribunal di Hof a duna di konosé ku nan ta haña Waterfort kulpabel di e asesinato.
Segun e tribunal, Waterfort a asesiná Stefania sin niun tiki eskrúpulo, mirando kon e likidashon a tuma lugá.
E presidente di e tribunal a bisa ku eigenlijk e sentensia ta 30 aña , pero dor ku ta trata di un kaso basta bieu, Hof ta duna e akusado un deskuento di dos aña.
Mirando esaki, e tribunal a ordená pa detené Waterfort inmediatamente den e kaso aki.
E akusado ta sintando un kastigu di 15 aña pa un otro kaso di asesinato di kual e kondena aki tin ku kaba na aña 2022.
Despues di esei, e kastigu aki lo kuminsá.
Aparentemente Waterfort tabata den un proyekto pa kuminsá prepará pa bai kas, mirando e komportashon ku e tin den e instituto.
Riba e dia en kuestion 5 pasa di 10 di mainta, e víktima a keda asesiná den e blòk ariba menshoná na altura di sèl 206.
E tabata lomba sunú i a keda tirá na altura di su kabes parti patras, pa despues su agresor lòs 3 bala mas riba dje ora ku ya el a kai.
Despues e sospechoso a tira e revòlver kaliber 38 spesial banda di e víktima i kore bai. Tabatin 5 huls benta rònt di e víktima i un bala mas ku a keda den e revòlver.
Den korte di promé instansia, Waterfort a duna di konosé ku e no sa nada di e asesinato. E tabata bañando ora el a tende tiru pa despues sali i kore bai skonde tras di muraya.
Waterfort den prinsipio semper a hasi uzo di su derechi keda ketu.
Den korte di apelashon, e akusado a bisa otro kos. Segun Waterfort, promé ku e asesinato, un detenido a kore drenta su sel, skonde, pa despues e kore sali kometé e echo i drenta su sel bek skonde.
Na momento ku a surgi e kore kore, e hòmber lo mester a sali fo’i su sel bek i kore bai. Waterfort a ninga di bisa ta ken e prezu aki ta, pa evitá ku e mes , su yunan i famia nan bida ta na peliger.
El a bisa ku e no a deklará esaki anteriormente pa motibu di represaya.
E presidente di e tribunal di Hof a duna di konos’é ku e detenido di fam Hodge a deklará ku e tabata papiando ku e detenido Emanuel, ora ku Stefania a sali fo’i su sel bai para papia ku Pieters.
Promé el a pasa esun ku a tir’é mata ku e no ta menshoná su nòmber, ku tabata sintá riba un hèmber.
Hodge a sigui bisa, ora ku Stefania a sigui kana bai, esun ku tabata sinta riba e hèmber a sali bai su tras, tir’é tras di su kabes i pa despues sigui tir’é ora el a kai.
Mas aleu hues a bisa ku e otro detenido di fam Emanuel a deklará di a tende 4 tiru i ora el a bai wak el a mira ku ta el Diablo a tira e víktima den su kabes tras di su lomba.
Na hues komisario Emanuel a deklará ku el a deklará bou di preshon di Marley Felix, pero en realidat e no a mira nada.
Felix mes a deklará na hues komisario ku nèt el a bai wak televishon serka un otro detenido den su sèl i a pasa mira Diablo sinta riba un hèmber.
Despues ku Stefania a pasa, Diablo a lanta para bai tras di Stefania i tir’é den su kabes. Despues e akusado lo mester a kore bai su sèl ku paña di kaki bistí.
Waterfort a bisa ku tur loke e testigunan i wardadónan di prezu a deklará , ta mentira i ku e no ta esun ku a tira Maná Maná.
E Tribunal di Hof no a kere nada di loke Waterfort a bisa i a konden’é na e kastigu ariba menshoná. Abogado di e akusado mr Scheperboer-Parris a bisa ku e ta hopi desapuntá di e desishon di Hof i lo bai deliberá si nan ta bai korte di kasashon.