WILLEMSTAD.- Nos ta bibando den un pandemia. Komo tal ta den un normal nobo. E kustumbernan tambe mester tene kuenta ku e normal nobo. Esei ta nifiká bira kreativo kon por ekspresá sentimentunan na un manera diferente. Esaki ta reakshon di agensia funerario El Tributo, despues ku ayera vidionan tabata sirkulá riba retnan sosial di despedida di un dama defuntu.
Ta trata di un dama ku ta gusta nos fiestanan kultural manera karnaval, Seú i su fiestanan. A bai pasa na kas dje defuntu, i aki tabatin hende ku disfras di karnaval, i di seú, ku kantante konosí tabata warda e waha di morto na kas. Ku músika a baila bai kas dje dama.
El Tributo ta kondená enérgikamente e loke a pasa ku su shofùr na kaminda pa santana. A pasa kas di e defuntu i hañ’é konfrontá ku un situashon ku e no tabata na altura di dje ni prepará p’e.
El Tributo ta trese dilanti ku nan no tabata na altura di e homenahe aki, i no ta konta ku nan aprobashon tampoko bou di situashon ku ta biba aktualmente i pues no por karga ningun responsabilidat pa esaki.
Komo ku El Tributo no ta toka privasidat di famia nan lo no bai den mas detaye. Si por bisa ku mesun kantante aki a wòrdu prohibí di kanta na belorio di e defuntu. Ta e mesun kantante aki tambe a kanta den santana na entiero di un otro konosido karnavalista.
P’esei por ehèmpel El Tributo a introdusí live streaming, zooming, wèpsait eltributokondoler i otro uso di teknologia moderno pa sigui kombibí ku otro pero #Nami2. Un manera fásil ku famia por hasi pa honra bida di un defuntu ta traha un video di e persona su bida i manda esaki pa tur persona ku no por bai entiero. E ta un forma di honra e ser kerí i alabes un rekuerdo digital di e bida di e persona. Di e mesun forma si tin amistat i konosí ku kier ekspresá nan sentimentu na famia nan tambe por traha un video i manda esaki pa famia.
El Tributo sa ku e situashon di pandemia aki ta mishi ku tradishon bunita di rindi tributo na e ser kerí.
El Tributo ta komprondé i kombibí ku famianan ku e situashon ta hasi doló i ta difísil pa famia, sinembargo mester kuida otro pa NO lamentá ora morto kai debí na COVID-19 pa motibu ku no ta kuida i tene nos mes na reglanan preskribí pa gobièrnu di Kòrsou.
El Tributo a i lo sigui tene su mes na reglanan manera preskribí pa gobièrnu brindando famia oportunidat pa honra bida di nan ser kerí den e normal nobo.