WILLEMSTAD.- No ménos ku 15 partido polítiko lo bai ta den kontienda elektoral di dia 19 di mart próksimo. Lo bai tin 7 partido ku ya tin asiento den Parlamento, kompletá ku 8 partido adishonal ku den e fin di siman a haña mas di e kantidat di 789 votonan den e pre-elekshon. Si nos analisá e resultado dje pre-elekshon aki, por bisa ku tabatin sorpresa den diferente sentido. Sorpresa pa partidonan ku a sobresalí, pero tambe sorpresa di esnan ku a keda for di e kontienda nèt pa un kantidat mínimo di voto.

E sorpresa mas grandi a bini ku e rebibensia di PNP ku Ruthmilda Larmonie-Cecilia komo lider polítiko. Den e kaso aki PNP a laga un mensahe kla opteniendo no ménos ku 3.374 voto. E loke nos a konsiderá komo otro sorpresa tabata partido Un Kambio pa Kòrsou di Rayshel St. Jacoba ku su 1.514 votonan.

Ku KEM a logra 2.686 voto no tabata un sorpresa, teniendo kuenta e publisidat i e manera kon nan a bin ta profilá pa simannan largu.

E otro banda di sorpresa tabata primeramente partido Kumun ku ta profilando hopi i hasiendo hopi uso di medionan sosial, i ta den final a surpasá e kantidat nesesario na voto. Finalmente Kumun a ser honrá ku 942 voto. Otro sorpresa tabata algun partido manera MAVIS, Movementu KAS ku a keda afó pa un kantidat mínimo di voto

ELEKSHON

A base di e resultado aki ta nifiká ku e siguiente partidonan lo ta den elekshon di dia 19 di mart 2021:

PNP; KEM; Trabou pa Kòrsou; Un Kambio pa Kòrsou, Partido Democraat; Vishon; Movementu Kousa Promé; Kumun; PAR, MAN, MFK, PIN, Pueblo Soberano, Movementu Progresivo i Kòrsou di nos Tur.