WILLEMSTAD.- Independisashon di Konseho Supremo Elektoral, ku pa lei lo bira “Konseho Elektoral”, lo bai kosta un 470 mil florin pa aña pa su operashon. Esei ta un kalkulashon ku a ser hasí di parti dje KSE aktual, i di akuerdo ku sr. Pacheco Römer, presidente di KSE den deklarashon na Parlamento e siman aki.

Tambe den pregunta dje parlamentarionan a pidi klaridat riba e kantidat di plaka ku e último elekshon a kosta. I riba esei sr. Römer a splika ku e gastunan tabata di 1.9 mion florin. Por sierto, e ta kalkulá ku pa e próksimo elekshon na mart di 2021 esaki lo bai kosta e mesun 1.9 mion florin. Pero esei ta sin tene kuenta ainda ku e problemanan ku ta kompañá e pandemia di COVID-19.

No mester lubidá ku lo tin di hasi un kantidat di ahuste relashoná ku aspektonan di higiena etc., pero esei a gastunan ku KSE no a kalkulá ainda.

Kompensashon:

Durante e reunion di komishon sentral pa trata e proyekto di lei aki riba independisashon di KSE, tin parlamentario ku a lansa e sugerensia pa kompensá miembronan di KSE ku algu. I segun sr. Römer, esei no ta algu ku e lo por disidí riba dje, pero si disidí esei e ta bon biní.

Pero tin personanan ku si ta ser pagá pa sinta na urnanan riba dianan di elekshon. Den e kasonan ei e presidente dje urna ta risibí 300 florin miéntras ku e demas miembronan ku ta asistié a risibí 200 florin.

Mas aleu el a splika ku, no ta sin mas ta pone ámtenarnan sinta na urna pa traha. Ta si e servisio ta permití esei nan lo por pidi pa nan bai traha. Pues no ta asina ku ta obligá ámtenarnan pa bai sinta na urna. Di otro banda, e empleadonan di Kranshi mes i tambe miembronan di Kuerpo Polisial ku ta trahando riba e dia ei lo haña pago den forma di overtime serka gobièrnu.

Pa loke ta e kantidat di votadónan, segun sr. Römer na 2012 tabatin un kantidat di 88.000 votadó registrá, di kual un 86.000 a bai vota. I tabatin 1.963 voto inválido. Na 2016 e kantidat tabata di 80.400 i e votonan inválido tabata 1.383, i na 2017 tabatin 120.000 votadó, di kual 79.000 a bai vota i 1.138 tabata inválido.

Pues loke por a not ata ku e kantidat di votonan inválido a bahando.