Eliminá tur loke ta wanta awa pa evitá sangura di dengue

WILLEMSTAD.- Servisio di Salú Públiko di Kòrsou (UO G&Gz ántes GGD) ta enfatisá e importansia i urgensia pa eliminá tur lugá (artefakto i tanki) kaminda sangura por pone webu aden i brui.

Miéntras Organisashonnan di Salú i Servisionan di Salú ta konsentrando riba e pandemia di COVID-19, nos no mester lubidá e peliger di dengue, Chikungunya òf Zika.  Komunidat mester yuda evitá un eventual epidemia kousá pa kualke di e 3 malesanan aki. Aktualmente ya kaba algun isla den Karibe ta eksperensiando kasonan di Dengue di e tipo 3 (tin 4 tipo) i hasta tabatin 3 kaso fatal. E peliger di sangura di Dengue (Aedes aegypti) ta ku na momento ku un sangura muhé ku ta infektá ku e vírus di Dengue piká bo, e sangura ta pasa e vírus over pa bo. Despues di un par di dia (mas o ménos 3 dia) bo ta bira malu ku síntoma manera doló tras di wowo, keintura, doló di kabes i wesu.

Tin diferente sorto di sangura. Solamente e sangura Aedes aegypti por infektá bo ku e vírus di Dengue, Chikungunya òf Zika. Responsabilidat di kada siudadano ta pa eliminá fokonan kaminda sangura por pone webu.
Akshon ku kada siudadano mester tuma ta:

- Kontrolá tur kaminda ku awa por keda para. Mihó manera pa eliminá sangura ta  pa no tin apsolutamente nada ku por wanta awa.
- Tira tur artefakto artifisial òf opheto manera tayer, barí, kosnan di plèstik, ko’i hunga di mucha ku no ta usá i por wanta awa afó. Kosnan di uso por warda bou di dak pa evitá awa para den nan. Chèk skòter bou di pòchinan di mata pa bichi di sangura. Kambia e awa den glas òf pòchi un biaha pa siman i pasá skeiru òf bròsh pa kita webu (punta pretu) di sangura. Por trata e awa tambe ku larvisida òf yena e pòchi ku tera.

- Barí, tanki di awa i renbak ta wòrdu usá hopi pa fangu áwaseru. Tapa e barí ku paña i elastik di manera ku sangura no por drenta i sali. Por pone larvisida òf piská tambe aden. Renbak mester ta hermétikamente será. Si e ta habrí, mester pone piská aden òf larvisida. No por usa piská i larvisida huntu. Chèk het (goot) di dak i limpia esaki saka blachinan pa awa no keda para aden.

Personanan ku ta fangu awa por buska larvisida grátis na UO G&Gz (GGD) na Piscaderaweg 49 di djaluna pa djabièrnè entre 8’or di mainta pa 12 or di mèrdia. E larvisida no ta tóksiko pa humano tampoko bestia.
Ban eliminá tur lokual ta wanta awa pa asina nos kombatí e sangura ku ta transmití Dengue, Chikungunya i Zika.