WILLEMSTAD.- Un dia e bèrdat lo sali na kla, ta loke ku Elmer “Kadè” Wilsoe a bisa djasabra último den Soberano City. El a bisa ora daña bo nòmber, e hende hamas i nunka por limpi’é, semper ta keda pida sushi.

“Meskos ku ta papiando di e último hende ku a papia ku Helmin Wiels na telefòn. Mi a papia un minüt promé ku 3’or ku Helmin Wiels riba e djadumingu ei. Ta hende ku no konosé Helmin ta kere ku e tin 2 ora sin papia na telefòn. Esun ku konosé Helmin sa ta dos telefòn i konstantemente e ta na telefòn”.

Wilsoe a bisa di ta sigui bai dilanti i ora e hala rosea profundo, e sa ken e ta i unda e ta pará i tin famia grandi di Pueblo Soberano ku ta para su tras. E ta sintié bon, protehá i na kas.

“Un dia e bèrdat ta sali. E bèrdat lo sali na kla ken ta tur e hendenan ku a susha mi nòmber i e dia ei mi ta hasi kuenta ku nan, un pa un. Nan no rabia i niun hende no rabia, pasobra mi ta menshoná nòmber di tur hende”.

Wilsoe a bisa esaki relashoná ku e último desishon di korte siman pasá pa no kita su nòmber komo sospechoso den kaso Maximus. Esaki ta di dos biaha ku Wilsoe su petishon ta keda rechasá den korte.

E fiskal enkargá ku e kaso Maximus a bisa ku e mester di mas tempu, pasobra ta trata di un kaso grandi.

Den su desishon wes komisario a bisa ku e kaso t’asina leu ku ya tin un kaso penal kontra di un dje sospechosonan ku a intermediá pa buska i paga e asesinonan dje lider di Pueblo Soberano, Helmin Wiels, den medio aprel próksimo. Mirando ku falta 3 luna i mei p’e kaso keda trata den korte, wes komisario ta haña ku por warda te ora e kaso keda tratá.