WILLEMSTAD.-Manera EXTRA a informá algun ratu pasá, e polítiko Elsa Rozendal a kibra ku partido MAN, pero for di e momentu ei tabata konosí ku e lo no bai ku e asiento. Naturalmente e kiebro a kousa sorpresa sigur teniendo na kuenta ku nèt awor aki ku Parlamento ta tratando presupuesto. Den su promé reakshon Elsa Rozendal ta bisa: ‘e retonan ku nos ta konfrontando komo pais, dia pa dia, ta birando mas grandi i kompleho.  Esaki ta eksigí pa kada un di nos duna mas ku nos a bin ta duna te ku awor i tambe tin e kurashi pa kana un kaminda ku realmente ta sirbi nos komunidat i saka nos for di e situashon difísil i kompliká ku nos ta den na e momentunan aki. Awe mi ke informá boso ku mi a tuma e desishon pa no sigui ku MAN i kuminsá eksplorá otro alternativanan pa sigui sirbi nos komunidat.

Awe mainta den un karta pa direktiva di MAN, mi a informá partido di mi desishon.

Tambe mi a pone e asiento ku aktualmente mi ta okupando den Parlamento na disposishon di partido. Asina MAN por sigui sostené e koalishon aktual.” Sigui korant EXTRA pa tur detaye relashoná ku e desaroyo aki.