WILLEMSTAD. - Elverick  alias “Elverich” Juliana ta sali hopi di bon ayera den e veredikto di korte di apelashon. Antonio  “Beat” Paulina  di 22 aña a pèrdè su bida dia 20 di mei 2015 despues ku un grupo di hòmber a akus’é pa ladronisia di un skuter.

Den korte di promé instansia Juliana a keda kondená na 14 aña  komo kómplise di e asesinato   despues ku fiskal a demand’é na 4 aña. Ayera e tribunal di korte di apelashon ta destruí e veredikto  i ta konden’é na 8 aña.  Tambe el a keda kondená pa posishon di arma di kandela kaliber 38. E veredikto di korte di apelashon  a duna di konos’é ayera ku no por prueba ku Juliana mes tabata den posishon di un arma di kandela mirando ku e mes a keda menasá na vários okashon durante e búskeda. Mirando esaki e ta keda apsolvé for di  e posishon di arma.

Hues den korte di promé instansia a haña ku Juliana a hunga víktima den e kaso pero na su pareser e tabata mesun kulpabel ku e otronan.  Segun e tribunal  den su veredikto e partisipashon di Juliana den e búskeda di e skuter tabata un kontribushon asina signifikante pa ku e asesinato den konhunto koperashon ku  Andrade i Bonifacio. Segun e tribunal, loke si no por keda probá ta ku Juliana a aktua den konhunto koperashon ku e otro nan. Loke si korte a haña probá ta ku Juliana a duna su otro ko-akusadonan informashon balioso  di e víktima durante e búskeda di e skuter i ku e tabata sa ku tabatin arma di kandela den e wega. Segun e veredikto mas aleu ku  Juliana tabata testigu di e palabranan ku Andrade a bisa den outo ku e lo mata Beat.  Tambe e veredikto a duna di konos’é ku Juliana a mira supuestamente kon arma a  keda poné na kabes di Ridderstap.  Korte di apelashon a duna den su veredikto tambe ku e dia ei mirando ku tabatin arma di kandela presente nan por konkluí  ku e grupo tabatin mal intenshon ku esun ku lo tabata e ladron di skuter.  Juliana a bisa ku el a apelá pa motibu ku e ta inosente den e kaso aki. Segun Juliana  e taba’tei presente dia ku e kaso a tuma lugá for di kuminsamentu pero e no tabata sa nada di e ladronisia di skuter. El a konta ku e konos’é “Ge” pa motibu ku e tin yu ku su ruman muhé. El a duna di konos’é  ku el a keda buská pa Ge bou di preshon di arma di kandela. E tabata den su studio ora ku Ge a bèl e bis’é ku ta e a kue e skuter i wak pa e sak’é sino nan lo tir’é. Segun Juliana mes ora el a yama mama di Ge pa bis’é di e menasa di su yu. Despues di algun ratu tantu Ge komo Joao ta bin busk’é  i Alias tabata e shofùr. Ge a menas’é i bis’é ku e tin ku bai ku nan pa saka e skuter. Segun Juliana  Joao a bisa ku el a invertí 10 mil florin den e aparato.  Juliana  a konta ku den pasado e tabatin problema ku Ge pa motibu di un kadena. Segun e akusado  despues ku nan a busk’é el a mira Ge pasa e arma pa Joao. Nan a kuminsá diskutí kuné pa despues  Joao pone arma na su lomba i bis’é pa e bai mustr’é unda Ashley ta biba.

Estando na Ashley, Joao ku Ge a baha i a bis’é pa e tambe baha. Despues di esaki un hende ta bèl  nan i bisa ku nan a haña Ashley i awor mester bai buska Beat. Segun Juliana el a bisa nan pa bai bah’é na kas. Nan ta bolbe menas’é ku arma i bis’é ku  e mester a bai mustra nan unda Beat ta biba na Fuik. Bayendo einan nan  a topa Beat kantu kaminda di kual nan a para, Joao i Ge ta bula baha i Joao ta bringa ku Beat i kita su telefòn. Beat ta kore bai  kas i nan tambe ta kore bai su tras. Aki e mama di Beat ta sali i e ta mia kon Joao ta diskutí ku e mama. E mama ta bisa nan bin paden bin wak si tin niun skuter i a bisa nan ku e lo yama polis. Korte di apelashon ta haña ku Juliana a duna su kontribushon na e búskeda di e skuter. Korte a bisa di a tene na kuenta ku Juliana a yega di wòrdu kondená den pasado.