WILLEMSTAD.- Insidentenan grave ku sa tin den fin i kambio di aña tabata kasi nulo na CMC. Pero loke a hasi e situashon poko drùk ta hendenan ku malestar ku en bes bai dòkter di kas a bai CMC. No opstante ku CMC semper ta hasi yamada pa ora ta malu i no ta di gravedat pa akudí na dòkter di kas i no bai departamento di emergensia di CMC.

Bosero di CMC sra. Germaine Gibbs a duna di konosé ku entre 31 di desèmber i ayera mainta tabatin solamente 1 aksidente ku  vürwèrk. E pashènt a wòrdu tratá i por a bai kas mesora.

Pa loke ta trata aksidente di outo, a drenta 4 pashènt di kual 1 so a keda hospitalisá. Na total entre 31 di desèmber 12pm i 1e di yanüari 2023 12pm, 70 pashènt a reportá na Emergensia di CMC. Un gran porsentahe tabata kasonan ku por a wòrdu mirá dor di un dòkter di kas. Te ku ayera ketu bai e situashon tabata mesun kos ku konsekuensia esun ku ta “ménos” malu tin di sinta warda mas hopi pa haña turno pasobra ta atendé esnan di emergensia real promé.