WILLEMSTAD.-  - Un di tres empleado di Curaçao Medical Center (CMC) a tèst positivo pa COVID-19. E empleado akí ta laborá den un departamentu atministrativo i no ta di lenk na e dos kasonan anterior. Na momentu ku e empleado a konstatá síntomanan e tabata liber di trabou, pues koleganan na trabou no a kore riesgo pa infekshon. Na e momentunan akí e empleado ta na kas den isolashon.

CMC ta un mikrokosmo di nos komunidat, pues miéntras nos ta mira un oumento di kasonan riba nos isla no ta algu straño ku algun kaso positivo ta presentá entre nos empleadonan. Direktiva di CMC huntu ku departamento di ARBO, departamento Prevenshon di Infekshon, Outbreak Management Team i GGD ta sigui kolaborá i reforsá e pasonan nesesario pa protehá nos hòspital.