Mantené kalmu!

WILLEMSTAD.-Dr. Izzy Gerstenbluth a pidi komunidat pa mantené kalmu, apesar ku e echo ku tin un empleado di banko MCB a tèst positivo pa Covid-19. Esaki ta denominá komo un kaso di kontagio lokal i pa e motibu ei mester tuma medidanan di prevenshon.

Gerstenbluth a splika ku e departamentunan konserní ta den kontakto estrecho ku e kompania i e famia. Ya kaba ta tumando kontakto ku tur hende serkano na e persona infektá i sigur esnan ku tabata den kontakto kuné te ku 3 dia prome ku el a haña síntoma. Gerstenbluth a enfatisá ku no ta tur hende ku a bai branch di MCB na Rio Canario ta malu. E empleado di MCB ku a tèst positivo NO tin kontakto ku kliente, pues klientenan no a kore peliger. E koleganan ku si tin kontakto ku e empleado tambe a haña enkargo pa keda kas meskos ku famia direkto di e empleado i asta gerensia di MCB a sera e banko na Rio Canario. Famia di famia no ta kore rísiko.

Gerstenbluth a hasi un apelashon dramátiko na tur hende pa ban bèk na loke nos a siña esta tene distansia. Kada hende tuma nan propio responsabilidat i no bai kaminda tin aglomerashon di hende.