Sala di operashon ta sigui den operashon despues di limpiesa rigoroso

WILLEMSTAD.-Curaçao Medical Center (CMC) den un informe ofisial ta indiká ku e trahadó miembro di sala di operashon, ku a tèst positivo pa COVID-19 djabièrnè último, ta den isolashon. Inmediatamente direktiva di CMC a aktivá i a implementá medidanan konforme protokòl pa asina minimalisá riesgo na personal i pashènt. Outbreak Management Team (OMT) di CMC den kolaborashon ku ARBO a hasi “contact tracing” i a tuma kontakto ku tur pashènt i miembro di personal ku a bin den kontakto direkto den e último dianan ku e miembro di personal ku a keda infektá ku COVID-19. E persona infektá tabata tin ekipo di protekshon bistí na tur momentu ku e tabata atendé ku pashènt, pues no tin riesgo di infekshon. Tur miembro di personal riba e lista di kontakto a bai den karentena inmediatamente ku eksepshon pa esnan ku funshon vital. Un persona por traha bou di reglanan estrikto di protekshon segun protokòl di COVID-19. Sala di Operashon ta wòrdu desinfektá tur dia segun protokòl i tur operashon ta planiá pa kontinuá. Entretantu, tur persona ku a tèst riba e lista di kontakto di e speshalista ku a tèst positivo fin di ougùstùs, a resultá negativo i no tin síntoma di COVID-19. Mas detaye den edishon di EXTRA.