WILLEMSTAD.- Pa e promé generashon dje poblashon di migrante prosedente di Venezuela ta asina ku den kasi tur grupo di edat nan tin un parti relativamente haltu di hendenan empleá kompará ku esnan nasé na Kòrsou, ku eksepshon di e grupo di edat di entre 25-44 aña. Asina Konseho Sosial Ekonómiko (SER) ta bisa den su rapòrt riba e kontribushon di migrantenan na nos situashon sosio ekonómiko.

Mas aleu e ta bisa ku, e kantidat di hende ku ta traha di 15+ ta mas haltu den e promé generashon prosedente di Venezuela kompará ku esnan ku no ta migrante. E promé generashon ta ser konsiderá komo tur hende ku tin un òf ámbos mayor ku a nase den eksterior. Pero banda di esei e desempleo ta mas abou si pa e grupo di no migrante, pues hendenan lokal.

E poblashon den e grupo di edat di 25-44 aña ta mas haltu den e promé generashon prosedente di Venezuela (47 porshento) kompará ku otro gruponan di edat. A base di e informashon aki lo no por saka un konklushon kla pa e poblashon di migrantenan prosedente di Venezuela.

Mas aleu e rapòrt ta bisa ku, pa e promé poblashon di migrantenan for di Repúblika Dominikana ta sali na kla ku e grupo ku tin trabou bou di 25 aña i riba 64 aña ta mas haltu ku esnan ku a nase na Kòrsou. E kantidat di trahadó den e grupo di edat di 25-64 aña ta mas abou ku esnan nasé na Kòrsou. Den e último grupo di edat aki di 25-64 aña tin alrededor di 80 porshento di e poblashon di migrantenan. Pa motibu dje struktura di edat di e poblashon di migrante aki, e parti lokal di 15+ ku ta traha ta mas haltu ku esun di no migrantenan. Finalmente mester bia segun SER, ku e porsentahe di desempleo di migrantenan for di Repúblika Dominikana ta mas haltu ku esun di no migrantenan. Migrantenan di promé generashon for di Repúblika Dominikana, despues di nuansá un ke otro pa edat, ta parse di tin un efekto negativo riba e estadístikanan di merkado laboral dje poblashon di Kòrsou.

Finalmente SER, pa e poblashon di imigrante prosedente di islanan Karibense den Reino i St. Maarten, ku e kantidat empleá den tur grupo di edat ta mas abou kompará ku esnan ku a nase na Kòrsou. Tambe e kantidat ku tin trabou di 15+ ta mas abou den e poblashon di migrante kompará ku esnan lokal. Pa e promé generashon dje poblashon di migrante prosedente di St. Maarten ta konta ku e porsentahe di desempleo ta mas haltu kompará ku hendenan lokal.

Pues segun SER, e promé generashon di poblashon di migrante prosedente di e parti Karibense di Hulanda i St. Maarten pa e motibunan aki tin un efekto negativo riba e estadístikanan di merkado di laboral dje poblashon di Kòrsou.