NAPA ta habri prinsipalmente pa funshonnan vital

WILLEMSTAD.- E medidanan di protekshon rondó di Covid por i ta trese inkumbiniensia pero ta bon pa tur hende komprondé i realisá ku tin un punto di salida i esei ta; ‘Tur hende keda kas’! Esei ta pa evitá aglomerashon i asina evitá mas kontagio den nos komunidat. Na palabra Ronny Cornelis na kabes di e tim di MEO ku huntu otro servisionan ta hasiendo esfuerso maksimo pa tur hende den komunidat tene nan mes na reglanan di Covid i asina kuida e poblashon aki.

Manera EXTRA a informa anteriormente, e kompania NAPA ku ta brinda servisio importante na ambulans, polis i otro hendenan den funshonnan vital tambe ta será sinembargo e servisionan vital por pega si e kompania no brinda nan servisio. EXTRA a trese ehèmpelnan konkreto kaminda garashi di polis òf ambulans no por haña tire, bateria i otro piesanan pa nan vehíkulonan por sigui move.

Cornelis den un splikashon na EXTRA a mustra ku gobièrnu a introdusí dekreto di luganan ku ta vital i esnan ku no ta vital. Di e forma ei ta identifiká si un servisio òf funshon ta importante, urgente i nesesario. Semper mester keda hasi e pregunta si kualke tarea òf servisio ta importante, urgente i nesesario.

Den e kaso di ambulans, polis, brantwer i asta e outo di dòkter etc. ta funshonnan vital i meskos ta e vehíkulo ku nan ta hasi uso di dje. Si e ambulans, outo di polis etc. no por move esei por pone bida di hende i seguridat di pais na peliger. Pues e ta importante, urgente i nesesario. E vehíkulonan ei por warda, e kontesta ta fásil no nan no por warda. Cornelis a mustra riba e letranan di kada lei i tambe e espíritu di lei.

E punto importante ta ku mester evitá ku sea na e lugá di drecha tire, pone bateria òf kualke otro sitio ku hendenan ta forma aglomerashon. Ku otro palabra un empresa ku ta sirbi funshon i servisionan vital por habri, pero ta bon pa e no habri porta pa tur hende kana yega. Duna servisio na manera diskreto na esnan ku realmente tin un funshon vital i den kaso ku hende den komunidat tambe mester di un bateria òf tire laga e hende ei traha sita a base di nan plachi di dia i asina ta evitá aglomerashon i mas kontagio.

EXTRA a kompronde ku Napa por habri, pero na un forma diskreto.

 

LAGA UN KOMENTARIO

Please enter your comment!
Please enter your name here