WILLEMSTAD. - Curinde huntu ku algun empresa di Zona Ekonómiko di Kòrsou, riba invitashon di Ministerio di Desaroyo Ekonómiko, a bishitá República Dominicana pa partisipá den “HUB Cámara Santo Domingo 2018”.

Ta trata di un eksposishon komersial grandi na República Dominicana ku ta ser organisá pa di 3 aña konsekutivo. E eksposishon a tuma lugá di 6 pa 9 di mart último.

Un kantidat di 4 empresa di Zona Ekonómiko di Kòrsou a partisipá den “HUB Cámara Santo Domingo 2018” kaminda nan por a konektá ku otro empresarionan i hasi negoshi ku empresanan di República Dominicana mes i tambe di otro paisnan den Karibe ku a asistí na e eksposishon.

Empresanan di República Dominicana i tambe di otro pais Karibense, por a bishitá e eksposishon i mira lokual komersiantenan di Kòrsou tin pa ofresé. Komo tal, e empresarionan lokal ta tin un stènt pa show nan produktonan.

Tabatin oportunidat tambe pa kada komersiante lokal tene reunionnan individual ku empresanan ku ta interesá den produktonan di Zona Ekonómiko di Kòrsou i e empresanan por a hasi nan pedido di merkansia mesora.

E potrèt athunto ta duna un bista den e sala kaminda komersiantenan di Zona Ekonómiko di Kòrsou a tene enkuentronan individual ku e empresanan.

Ku esaki Curinde den su afan pa promové Zona Ekonómiko di Kòrsou, ke enfatisá e importansia pa komersiantenan di Zona Ekonómiko sigui partisipá na tipo di eventonan asin’aki kaminda nan por ofresé nan produktonan internashonalmente.

Foto