Business Brainer a keda fundá na 2016 pa Roxanne Larmonie, Danique Zimmerman i Rochelle Monte. Tres dama ku ta traha intensivamente pa duna nan kontribushon na nos komunidat. Kuminsando ku guia empresario i futuro empresarionan i awor ta konsentrá tambe den yuda hendenan ku a pèrdè trabou i ku ke kuminsá ku nan propio empresa. Un reto total ku nan a konta Djasabra di dje, trahando i yuda nos hendenan.

Danique Zimmerman a splika; Business Brainer ta un metodologia den kual ta guia hendenan ku ke bira empresario òf ku tin un negoshi i nan a yega un kaminda ku el a pega i nan ke hib’é na e próksimo nivel. Ta un metodologia kaminda nan ta hasi hopi pregunta pa asina e hende mes finalmente por krea su strategia di negoshi. Business Brainer ta eksistí for di 2015. I el a keda lansa na 2017 ku e promé training. Na luna di desèmber, analisando kiko lo bai hasi den 2019 nan a realisá ku e kombersashon tabata bayendo abou pasobra situashon ekonómiko no ta masha bon. Pero nan a realisá tambe ku nan tin algu ku por ta un balor agregá. Nan a tèst e Business Brainer ku muchanan 7 pa 18 aña i nan a krea negoshinan ku potensial. Asina nan a kue loke ku tin, den e área di influensia i wak kon e por aportá na ekonomia. I asina a yega na e Business Brainer Rise & Grind, kaminda 10 persona a haña oportunidat ku si nan a pèrdè trabou i ke bira empresario por apliká. E sekshon aki a kuminsá algun siman pasá.

Ku e grupo ei nan lo pasa henter un trayekto di 12 siman, kaminda e hendenan ta wak tur aspekto di nan negoshi esta “branding”, strategia, finansa, merkadeo i ora nan ta kla nan lo tin un plan di negoshi kompleto desaroyá.

Rochelle Monte

ta haña importante pa bisa ku ta wak loke por kalifiká komo e hendenan aki su DNA. Kiko, dikon nan ke hasi algu, i no pa djis hasi algu sin mas, pero ki impakto nan ke tin pa e grupo ku nan ke sirbi. Pero tambe wak ki opstákulo nan ta topa pa yega kaminda nan ke yega. Hopi bia e opstákulonan ei ta miedu i duda den nan mes. E organisadónan den Business Brainer ta duna e hendenan aki e empuhe i ya for di e 5 lès por a mira ku e hendenan a kuminsá hasi moveshonnan. Nan a kuminsá manda karta pa klientenan. Esei ta e intenshon di Business Brainer, pone e hende move pa asina e por hasi su negoshi riba su mes.

Roxanne Larmonie

a bisa ku apesar ku situashon ekonómiko ta wanta, tin espasio pa empresanan na Kòrsou. Mas òf ménos 26 mil empresa chikí tin na Kòrsou i tin espasio pa mas. E hendenan tin hopi kreatividat i pashon i for di e pashon nan ke kuminsá un negoshi. Pero hopi biaha loke ta stroba ta e miedu, pasobra nan tin famia pa kria, responsabilidat i nan ta kana rònt ku e idea pa kuminsá ku algu pero tòg no ta hasié. E situashon awor ta fèrfelu pa hopi hende, pero esei ta un di e motibunan ku a skohe e grupo aki. Nan a pèrdè trabou kaba i esaki ta e oportunidat pa nan hasi loke nan kier a hasi tur e tempu pero debí na miedu i sirkunstansia nan no a hasié. I e variedat di loke nan ke hasi ta hasi posibel pa nan kuminsá. E espasio tei.

Negoshi nobo ta yuda ekonomia....

Rochelle a base di eksperensia propio a konta ku a keda probá na Merka den un investigashon ku hopi negoshi chikí a lanta den un reseshon ekonómiko. Esei ta yuda ekonomia krese. Rochelle a konta kon su tata a pèrdè trabou na isla, el a keda motivá pa kuminsá ku su mes negoshi. El a kuminsá ku su negoshi i duna 5 hende trabou. I despues di 20 aña e negoshi aki ta eksistí ainda. Esaki ta un prueba ku “entrepreneurship” ta duna perspektiva i ta yuda famianan i yuda krese ekonomia. I tur kos ta dependé kiko e hende ke bini kuné i sin nesesidat eifó por lanta un negoshi. Business Brainer ta purba motivá e hendenan pa no hasi algu ku tur hende ta hasiendo eifó kaba. I den e grupo ku nan ta trahando kuné aktualmente, tin un variedat di negoshi lantando. Por ehèmpel krio di bestia, training di consultancy, atministrashon, guia, hendenan ku produkto desaroyá pa bende. I tin ku a bin ku idea pero ora a pasa den trayektoria di konosé nan mes, nan a kambia i pone algu ku semper nan tabata ke i ku nan a pensa ántes ku lo no tabata bon, pero ku e posibilidat ei tei. Rochelle a splika ku gobièrnu ta sostené nan pero lástimamente nèt ora mester a duna e finansiamentu a bini un stòp. Na apertura Mariela Olaria direktor di e sekshon ku ta stimulá empresa chikí a mustra su sosten moral. I ta di aploudí si ku dos banko komersial ku a mira den e importansia di kontribuí. Ta trata di MCB i Postspaarbank ku a bisa mesora ku nan ta bai pe. Kada un ta spònser 5 partisipante.

Lo sigui...

Roxanne a splika ku ora nan a saka  e posibilidat pa e hendenan por apliká, nan a haña mas di 50 hende ku a reakshoná. Esaki ta proba ku e nesesidat i e gana tei. I einan nan a tuma e desishon ku lo sigui. Komo no tabatin spònser a hasi 10 so pero lo bai hasi oira e grupo aki kaba. I nan ta spera di por haña spònser. Postspaarbank a bisa ku e próksimo grupo nan lo tei tambe.

Propósito di negoshi....

Pa e empresa ku kisas awor aki ta pasando den situashon difísil ku su negoshi, Danique a bisa ku nan ta hasi hopi pregunta. Ta bon pa bai bèk i wak kiko ta e propósito di e negoshi, e balor agregá i kiko a kuminsá inisial kuné i klek bèk ku e pashènt. E ora ei por krea e vershon nobo di e negoshi pa bai e próksimo nivel.

Rísiko....

Rochelle a bisa ku wak semper oportunidatnan eifó. Wak semper kiko tin rísiko, kiko ta debil i wak tòg e puntonan fuerte pa kapta e merkado eifó. I ta importante pa no pensa Kòrsou so pero pensa kiko por ofresé e paisnan eifó. Kòrsou ta chikí pero djis imaginá kiko por ofresé eifó. Oportunidat pa ekspandé i ofresé servisio eifó ta un di e kosnan ku si por hasié ta tòp awor aki. Pensa grandi i amplio.

Turismo ta fuerte...

Pa loke ta e sektor mas fuerte aktualmente ta turismo. Turismo ta mas fuerte i kresiente na Kòrsou awor aki. Por mira si ku hendenan ku ta bin ku kosnan den e mundu finansiero i tambe tin hopi hóben ta bai den agrikultura moderno, usando teknologia pa hasi loke nan ta hasiendo kaba pero mihó. Mundu ta kambiando i birando nobo i ta importante pa e empresario pensa ku loke e ta bin kuné ta duradero i ku no ta afektá nos medio ambiente pero si aportá na dje. Nan ta stimulando na empresarionan den e direkshon aki.

Na empresarionan...

“Nos tin un metodologia ku por yuda nan yega na lanta un negoshi ku ta bira eksitoso tambe pasobra bo ta siña strategia i finansa ku hopi biaha e konosementu ta ilimitá i dor di usa Business Brainer tin posibilidat pa tin éksito”. Business Brainer tin asta un app kaminda ta traha su parti finansiero. A base di esaki nan por splika unda nan a sali ku e sifranan. Tambe nan tin e  Business Brainer Tribe pasobra un empresario ta rekerí un Mind Set. I riba base regular nan ta topa ku otro. Riba nan Facebook por haña tur informashon pa e empresario i pa esun ku mester di un push i esun ku ke bai den direkshon di ser empresario.