Pa bini na remarke redukshon impuesto riba ganashi di 22% pa 15%

WILLEMSTAD.-Servisio di belasting den un karta na empresarionan di Kòrsou ta duna splikashon riba aplikashon pa tarifa mas abou di impuesto riba ganashi. Manera indiká den publikashonnan anterior di e servisio i di minister di finansa e porsentahe di impuesto riba ganashi ta baha di 22% pa 15% riba e promé 500.000 florin, pues un redukshon di 7% ku sigur lo por nifiká benefisio pa e empresario.

Ta asina ku a introdusí e redukshon di impuesto menshon na 2023. Konforme leinan eksistente un empresario no por deklará impuesto di ganashi provishonal (voorlopig) mas abou ku e aña anterior riba e deklarashon di impuesto di ganashi. Esaki ta posibel únikamente despues ku a entregá un​ petishon na Servisio di Impuesto pa por yena un montante mas abou.

Belastingdienst mes ta splika ku e petishon pa indiká un ganashi mas abou ku e aña anterior ​no ta nesesario si e impuesto riba ganashi ku e empresario mester paga ta mas abou komo resultado di e tarifa di impuesto nobo. Solamente por entregá un petishon pa yena un ganashi mas abou riba e deklarashon si e ganashi di e empresa berdaderamente a baha kompará ku e aña anterior.
Un faktor hopi importante den esaki ta ku e petishon pa por yena ganashi mas abou riba e deklarashon di impuesto riba ganashi mester ta entregá pa mas tardá 31 di mart 2024! Entretantu nos a yega medio febrüari 2024 kaba, pues tene kuenta.