Segun defensa hulandes Tromp tin hopi amigu pero hopi enemigu tambe

WILLEMSTAD.- Korte di promé instansia ayera a  kontinuá ku tratamentu di kaso Hercules. Su tratamentu a kuminsá djamars i a kontinuá ayera ku defensa. Ta trata di e kaso kaminda eks presidente di Banko Sentral Emsley Tromp, huntu ku e vise direktor di e banko Rene Lourents ta keda akusá pa 3 echo kastigabel ku nan lo a kometé.

Ministerio Públiko ta akusá ámbos pa labamentu di plaka, Soborno i tambe falsifikashon di dokumento. Ministerio Públiko durante tratamentu di e kaso, a hasi demanda di 3 aña pa Tromp i 2 aña i mei pa Lourents. Ayera abogadonan Marije Vaders ku tin e defensa di Lourents huntu ku abogado Niels  van der Laan ku a bin  fo’i Hulanda, tabata esun ku a representá e eks presidente.

Segun abogado van der Laan, durante e 8 añanan aki tabata un martirio pa su kliente. El a bisa ku ta trata di un  hòmber ku durante 30 aña largu, tabata un di esnan  mas poderoso di e isla, ku tabatin hopi amigu, pero tambe hopi enemigu.  Segun van der Laan, Tromp  a  hasi hopi kos ekonómikamente pa e isla Kòrsou. Entre nan el a evitá ku na aña 2010 Schotte a pasa Banko Sentral den man di mafioso italiano.  Segun e defensa, debí  na e salario haltu di  Tromp, esaki a krea un persepshon polítiko di korupshon den su kontra. Pero riba tur kos segun e abogado, Emsley Tromp ta un ser humano. Un persona ku durante e dos dianan di tratamentu di su kaso den korte, ta sintá basta nèrvioso dilanti e tribunal.

Pa basta aña kaba Tromp ta kana ku un kabes hopi pisa, relashoná ku e kaso aki. P’esei e ta puntra su mes pa kuantu tempu mas e mester keda asin’aki i tambe kon e kaso aki lo bai terminá, pasó ta manera ku esaki no tin final. Mas aleu e abogado a bisa ku durante e preparashon di e kaso aki, nan a pensa vários manera kon nan tin ku trese e defensa di nan kliente dilanti. No tabata fásil pa motibu ku tin hopi kos ku nan ke trese dilanti pa asina laga e pasado den pasado.

Nan ta asumí ku e wes ku ta tratando e kaso, no ta haña e pasado masha relevante, pero den e kaso aki ke wak pruebanan di e akusashonnan inhustu kontra Tromp i e  sistema remarkabel ku Tromp ya pa 8 aña largu ta keda persiguí pa Ministerio Públiko. P’esei nan ta spera ku e wes aki lo analisá e kaso, tuma desishon korekto, debí ku na nan opinion, e lokenan  Ministerio Públiko ta trese dilanti kontra nan kliente Tromp, no ta kuadra den niun konteksto.