WILLEMSTAD.- E kantidat di mortonan a konsekuensia di COVID a yega 90. Un situashon di basta preshon kaminda trahadónan den kuido intensivo tin di atendé ku 37 pashènt. Kada kaso den kuido intensivo, ta un kaso di atenshon.

Sinembargo ta biba eifó e persepshon ku di kon ta posibel ku awe un pashènt ta rekuperando i siguiente dia ta muri. Diferente famia a aserká EXTRA ku e preokupashon aki.

Nos a papia ku bosero di Curaçao Medical Center sra. Germaine Gibbs i el a splika nos ku e aspekto difísil di COVID ta, ku un dia un pashènt por ta mustra oke, i un otro dia nan por bai asina atras ku nan por fayesé.

COVID tin impakto riba no solamente pulmon sino otro órganonan tambe. Tin pashènt ku ta kana drenta hospital, wòrdu interná i bai di stabil un dia pa Kuido Intensivo djis despues.

Tur kurpa ta diferente segun sra. Gibbs, i tur pashènt su trayekto hospitalario ta otro.

Tambe el a reakshoná riba e profeshonalismo di e trahadónan den Kuido Intensivo, Kisas ta pasobra no tin sufisiente hende kalifiká pa hasi e trabou. Asta tin un app ta bai rònt indikando kuantu trabou tin i kon tenshon e trabou den Kuido Intensivo ta. Nunka e trahadónan a wak un situashon asina aki. Yudansa a bin si pero no den forma di personal kalifiká i komo tal e responsabilidat final ta den man di un grupo chikí. Esei ta e app nos ta referí na dje.

Germaine Gibbs ta bisa EXTRA sinembargo ku pa traha riba IC, no ta sin mas por pone un Algemeen Verpleegkundige.

Enfermeronan riba kuido intensivo mester ta di train spesífikamente pa kuido intensivo. Tin mas enfermero di otro departamento i tambe di afó ku ta asistí, pero nan ta guiá pa enfermeronan di IC ku tin un konosementu hopi mas amplio, ku esnan ku ta bin di afó.

“Nos enfermeronan di IC por wòrdu konsiderá e ekspertonan i nan ta wòrdu asesorá pa esnan ku a bin yuda”, Germaine Gibbs a splika EXTRA.

Alabes el a bisa ku tin di tene na kuenta ku nos Kuido Intensivo originalmente ta konsistí di 16 kama pa ‘High Care’ i ‘Medium Care’. Mester a ampliá e departamento pa karga 46 kama riba 4 diferente departamento pa asina akomodá pashènt ku COVID. Pues esaki ke men tambe ku CMC su tim original di Kuido Intensivo, mester a wòrdu parti den e diferente departamentonan di IC.

Tambe no mester pèrdè for di bista ku ta hende ta trahando den Kuido Intensivo i no robòt. Nan ta eksperensiando situashon di pashèntnan ku ta fayesé, famianan ku ta mira nan ser kerí bandoná e mundu aki i komo hende tin un preshon enorme riba nan. Kon ta para ku nan situashon mental. Germaine Gibbs a bisa ku CMC tin profeshonalnan kla pasa pa atendé ku esnan ku e situashon ta primi riba nan mentalmente.

‘Nos tin un tim di TCO (Team Colegiale Opvang) ku ta asistí nos koleganan ku mester di e sosten aki. Nos ta realisá ku e preshon ta haltu, i p’esei mes departamento di rekurso humano huntu ku ARBO a pone e plan aki den akshon ku sosten sikológiko i sikiátriko. Koleganan por presentá personalmente òf yama e number di TCO pa asistensia. I nan ta hasi uso di e yudansa aki”, asina Germaine Gibbs a bisa den e entrevista ku EXTRA.