Kada 6 luna e tabata pone sèn pa hòmbernan kondená den “Hato Shooting”

WILLEMSTAD.- Hues a bai di akuerdo ku fiskal pa e akusado A. Evelina (38)  keda será te dia 22 di òktober binidero, ora e kaso Themis bolbe presentá pro forma.

Ta trata di un kaso ku karakter internashonal di kual a detené e hòmber yu’i Kòrsou S. “Tyson” Quant na Dubai sospechá di ta kabesante di e NLS ku tin komo enkargo

vários kargonan kriminal entre otro asesinato, trafikashon di droga i labamentu di plaka.

Evelina ta keda sospechá di ta e hòmber ku tabata repartí plaka pa e damanan, famia i yunan di Quant. Tambe e lo tabata sòru pa buk i kumpra ticketnan pa e mulanan.

Segun Ministerio Públiko, kada 6 luna e tabata haña sèn di Quant  pa pone pa Martis  i Bart kual ámbos ta será pa e tiroteo i asesinato na “Hato shooting”.

Tambe e tabata depositá plaka pa vários “goons” ku ta será den blòk  7 a i 7 b.

Fiskal a bisa ku a haña den Evelina su telefòn fotonan di droga arma, munishon i por a mira via vários kòmbersashon, ku e tabata envolví den praktikamente tur kos di NLS.

Mas aleu fiskal a indiká ku parti di kòmbersashonnan tabata ku yu di defuntu Evi Hato, ku na 2019 ku a keda likidá na República Dominicana.

Mirando esakinan fiskal ta haña ku e gravedat di e kaso kontra Evelina, ta pisa mas ku su situashon personal.

Evelina na su turno a bisa ku tur loke e tabata sa, el a  deklará kaba i ku e ta totalmente inosente.

El a bisa ku e tin doló di kurason ku nan a maltratá su mama, kasi chok’é mat’é i e no ta mira pa kiko nan mester a hasié. “Mi mama ta hende malu i no por mira”, segun Evelina.

Tambe el a duna di konosé ku e tin un yu menor ku ta bira malu kada bes i ta dependé di dje.

El a pidi hues pa e bai su kas pa asina e kuida i sòru pa su famia. Mas aleu el a bisa ku e lo entregá su pasport òf dun’é “huisarrest” te dia su kaso keda tratá.

Fiskal a pidi pa rechasá e petishon pa “skòrs” su detenshon.

Hues den su desishon a bisa ku tin sospechonan serio riba e dagfar di e akusado i mirando gravedat di e kaso e ta rechasá e petishon. E akusado tambe mester keda será te ku dia 22 di òktober binidero.