WILLEMSTAD.- Djaluna awor EXTRA lo publiká e enkuesta ku UDC ta hasi durante di elekshon. For di 2003 UDC ta hasi enkuesta ku eksepshon di 2017 ora no a publiká e enkuesta hasí.

E enkuestanan aki tur bia tabata hopi serka di e resultado final. Ku un diferente di 4 pa 5% di diferensia i den mayoria kaso esaki tabata mas pa e partidonan grandi.

Si nos tira un bista riba e enkuesta na aprel 2017 ku no a keda publiká, nos por menshoná lo siguiente;

Pa partido PAR e enkuesta a duna 5 asiento i na final nan a haña 6 asiento. Pa partido MAN e enkuesta a duna 4 asiento i na final nan a haña 5 asiento. Pa MFK e enkuesta a duna 7 asiento i na final nan a haña 5 asiento, pa Kòrsou di nos Tur e enkuesta a duna 2 asiento i na final nan a haña 2 asiento, pa PIN tabata 1 asiento i na final e partido a haña 1 asiento tambe, pa Movementu Progreso tabata 0 asiento pero na final nan a haña 1 asiento. Tur e otro partidonan ku a bai elekshon na 2017 esta UKH, PNP, MKP, Frente Pan e enkuesta a duna 0 asiento i nan a haña 0 asiento.

Keda pendiente den EXTRA su edishon djaluna awor ora nos publiká e enkuesta efektuá pa UDC.