WILLEMSTAD.- For di Gerensia di ENNIA a sali e informashon ku pa e kliente nada a kambia. Tur pólisa ta sigui konta i esun ku mester di seguro por sigui hasi uso di e servisionan di ENNIA normal.

Dia 5 di òktober último, gobièrnu di Kòrsou a rechasá finansiamentu for di Hulanda. Gobièrnu a disidí di pone e rekursonan nesesario disponibel pa paga e penshun di e tenedó di pólisa di ENNIA Caribe Leven NV (ECL) den kaso ku rekursonan propio no ta sufisiente. Simannan benidero, ENNIA, Banko Sentral di Kòrsou i Sint Maarten i gobièrnunan di Kòrsou i Sint Maarten lo enfoká riba posibel alternativa pa restrukturashon di Grupo ENNIA.

Kiko esaki ta nifiká pa e kliente?

Pa e kliente esaki ta nifiká ku nada a kambia. Por kontinuá normalmente ku seguronan eksistente i  por sigui sera pólisanan nobo. Esaki ta konta pa ENNIA Caribe Leven NV, ENNIA Caribe Schade NV i pa ENNIA Caribe Zorg NV.  ENNIA su operashon ta sigui normal i ta kla pa sigui atendé kliente- i partnernan ku e mesun bon servisio ku ta brinda pa 75 aña kaba. ENNIA semper a kumpli ku tur obligashon di pago i lo sigui hasi esaki.

Komunikashon adishonal

Banda di brinda bon servisio, ENNIA ta konsiderá ku ta importante pa tene kliente- i partnernan bon informá. P’esei nan lo sigui duna informashon relevante riba próksimo desaroyonan na ENNIA.

Den e situashon aktual ENNIA ta komprondé ku tin hopi pregunta, i nan ke pa klientenan sa ku ENNIA ta sigui hasi nan máksimo esfuerso. Nan ta apresiá e apoyo konstante di  kliente- i partnernan i lo sigui atendé na e nivel haltu di profesionalismo i dedikashon ku klientenan ta kustumbrá di ENNIA.