WILLEMSTAD.- E sistema di enseñansa aktualmente, ku su desafionan ku e ‘online’ ta tres e kuné ta saka na kla e problema grandi ku nos ta sinta kuné kaminda esun ku tin moda ta logra. Esei ta un preokupashon ku rector magnificus di University òf Curaçao dr Francis de Lanoy tambe ta kompartí.

Den entrevista ku EXTRA dr de Lanoy a bisa ku na momentu ku COVID a dal aden aña pasa mart, dor ku UoC tin e LOFO (Leerlaren Opleiding Funderend Onderwijs) nan studiantenan den práktika a kuminsá bisa kiko ta e desafionan.

Na e momentu ei nan departamento di Center òf Digital Learning, ku ta hasi nèt e transferensia di enseñansa bibu pa esun ‘online’, ku tur e hendenan den e netwerk di e konferensianan ku UoC ta organisá riba digitalisashon pa algun aña kaba, a kuminsá yama pa puntra kon e kosnan tin di sosodé. Ora a haña  tantu pregunta asina, Rector a bia ku nan a bai hasi un investigashon riba Kòrsou, di e nivel di enseñansa ‘online’. A ripará ku e kondishonnan básiko ku ta Internet na kas, konekshon konfiabel, spit nesesario, e echo ku tur kas no tin koriente, e echo ku den e kas e situashon no tur ora ta deha pa un ‘online’, e forma didáktiko no tabat'ei serka tur dosente, pasobra enseñansa ‘online’ riba un kòmpiuter no ta meskos ku den klas. E ta un didáktika apart.

Den klas e mucha ta sinta di 7.30 mainta te 10.30 despues pouze i despues 11 or te 1.15. E mucha ei ta konstantemente den ambiente ku ta varia. Pero ora  e ta sinta su so tras di e kòmpiuter e no por hasié manera den klas. I p'esei e didáktika ku lès ‘online’ ta kambia.

Awor ta asina leu ku e parti intensivo por tuma lugá máksimo un ora pa un ora i kuart i e mucha mester tin aktividat kaminda e mes ta bezig. “Nos tur konosé e kos ei den zoom meeting, e promé mei ora bo ta konsentrá pero despues bo ta bai òf bai bin. I esei meskos ku enseñansa”, segun Francis de Lanoy.

Den e kuadro aki UoC a traha un rapòrt ku a keda entregá na minister di enseñansa pa mustra riba e kosnan ku mester tin, pa si un situashon sosodé, nos por dil kuné.

E peliger grandi ku tabatin ta ku bo ta haña e diferensia ku den enseñansa problemátiko kaba, ta bira un enseñansa di klase. Pasobra esun ku tin ta logra i esun ku no tin no ta logra nada. E preokupashon di mas grandi den tur nivel di enseñansa ta esei. E situashon ta otro pa e dosente i e studiante pero tambe e eksperensia edukativo ta otro.

“Si nos ke òf nos no ke bo ta entrega un mucha ku un retraso. Pasobra e situashon ta otro. Ni den e kantidat di materia ni profundidat no ta logra manera ántes i esei ta un punto di preokupashon tantu pa enseñansa primario, sekundario i na universitario”,segun dr Francis de Lanoy.