WILLEMSTAD.- Pa e próksimo dianan wardakosta i polis lo tene kontrolnan estrikto riba lama pa asina evitá kualke “fiesta” i aglomerashon. Manera ya wardakosta a indiká por lo pronto ta prohibí eventonan riba laman manera Fuikdag òf na Klein Kòrsou.

Segun bosero di Wardakosta Shalick Clement a indiká na Extra, Wardakosta i outoridatnan lo kontrolá abase di reglanan di COVID-19 riba laman.

Djadumingu último patruyanan di Wardakosta a bolbe ehekutá kontrolnan riba laman. E kontrolnan a tuma lugá durante di dia na entre otro pir di Sta. Barbara i Fuikbaai. Durante e patruyanan di djadumingu e públiko i e ‘boat community’ a tene nan mes na e medidanan bálido riba laman i no tabatin nada partikular ku a sosodé. Wardakosta konhuntamente ku Kuerpo Polisial di Kòrsou i Haveninspectie lo keda kontrolá severo riba laman e wikèntnan ku ta bini. Prinsipalmente lo kontrolá e promé djadumingu di yanüari 2021 pa evitá ku botonan ta bai Fuikbaai.

Manera ya ta konosí, e Fuikdag 2021 lo no ser permití i ta hasi un apelashon na komunidat i e ‘boat community’ pa tene kuenta ku esaki. Esnan ku bai den e área tòg for di trempan òf dia anterior, outoridatnan lo pidi nan pa bandoná e sitio. No ta permití pa organisá Fuikdag òf tene ningun tipo di enkuentro òf evento bou di ningun nòmber riba laman, na Fuikbaai, Klein Kòrsou òf otro bahianan manera Westpunt, Piscadera òf Jan Thiel durante di e pandemia, pa evitá aglomerashon di hende. E kontrolnan ku Wardakosta ta ehekutá ta pa pone òrdu públiko i pa personanan mantené nan mes na e medidanan ku Gobièrnu di Kòrsou a stipulá pa evitá COVID-19 sigui plama riba nos isla. E medidanan vigente riba laman pa botonan ta, ku ta permití solamente dos boto mará banda di otro i un máksimo di kuater (4) persona riba un boto.

Siguiendo medidanan stipulá di COVID-19 pa Gobièrnu di Kòrsou nos ta evitá pa e vírùs di corona sigui ser transmití. Wardakosta pa konsehá tur hende pa porfabor skucha notisia i informashon di gobièrnu pa keda na altura di e medidanan vigente. Wardakosta konhuntamente ku otro outoridatnan konserní ku órden públiko lo bai keda hasi kontrolnan severo riba laman.