WILLEMSTAD.- Ministerio públiko ta informá ku awe mainta, funshonarionan polisial bou di liderazgo di un fiskal di Ministerio Públiko (OM) di Kòrsou a tene un entrada hudisial den Kaya Picaron den bario di Katoentuin. Na e adrès aki a konfiská hopi artíkulo di balor manera oro i oloshi karu ku ta importante pa e investigashon. Tambe a konfiská un sistema pa produsí i distribuí monedanan digital, mihó konosí komo “cryptocoins”.

OM ta informá ku ta promé biaha ku a haña un instalashon asina na Kòrsou. Pa desmantelá i investigá esaki a haña yudansa di ekspertonan polisial di e materia aki. Ta trata di un investigashon ku a inisiá na Boneiru i awor a bira un kaso di Kòrsou. E sospechoso den e kaso aki ta e hòmber M.C.M.T. (1974). E ta ser sospechá di estafa di un banko na Boneiru.