WILLEMSTAD – Relashoná ku un kaso den investigashon pa ku pòstmentu di pakete ku droga awe mainta e departamento di droga di Kuerpo Polisial di Kòrsou huntu ku marechaussee a hasi un entrada hudisial na dos adrès. A bai primeramente na un adrès na Kura Piedra i otro adrès den Brievengat. E personanan sospechoso ku outoridatnan ta buska a pone nan nòmber riba pakete ku droga pa pòst esaki nan pa eksterior. Niun di e personanan ku polis tabata buska no tabata na kas na niun di e dos adrèsnan. A indiká na e famianan presente pa instruí nan sernan kerí pa entrega nan mes mas pronto ku ta posibel na Warda di Polis. Informashon preliminar ta indiká ku ya e dos sospechoso nan a mèldu na warda. Einan nan lo tende kiko ta e pruebanan ku tin den nan kontra ya asina nan por duna nan kuenta i rason relashoná ku investigashon den e kaso di pòst pakete ku droga aki.