Ta trata investigashon hudisial relashoná ku minister Glenbert Croes

ORANJESTAD.- Pais Aruba ta den un situashon ta basta insertidumbre riba e djamars aki despues ku a bira konosí ku outoridatnan hudisial a drenta na algun adrès pareu den kuadro di un investigashon ku ta tumando lugá. Koleganan di 24.com na Aruba ta informa ku outoridatnan a tene entrada hudisial na Dimas ku ta e departamentu di gobièrnu ku ta atendé ku asuntunan di ekstranheronan, pues algu paresido na e departamentu di imigrashon na Kòrsou.

Tambe a bai na kas di mayornan di minister Glenbert Croes ku ta na Cumana 84. E kas na Cumana 84 ta kas di defuntu Betico Croes, libertador di Aruba, kende ta tata di Glenbert Croes. Banda di esei a bai tambe na sentro di gobernashon esta e sitio unda ministernan di Aruba tin nan ofisina. Ministerio Publiko di Aruba ta informa ku dentro di poko nan lo emití un komunikado di prensa pa splika loke ta pasando. Asina tin mas detaye EXTRA lo informa di esaki.