WILLEMSTAD. -  Autobusbedrijf Curaçao (ABC) ta informá ku entrante 1 di febrüari tarifanan di konvoi lo subi ku 0.30 sèn. Pa 65 plùs ku SmartPass tambe e tarifa a keda adaptá, nan lo risibí 0,25 sèn deskuento riba e tarifanan nobo. Un persona ku edat di 65+ i ku no tin SmartPass ta paga e tarifa sin deskuento.

Manera ya no ta un sekreto, ABC ta enfrentá retonan finansiero for di aña 2019 i den aña 2020 un bahada èkstra di 40% okashoná dor di COVID -19.

Pa e motibu aki a aserka Gobièrnu di Kòrsou ku e petishon pa subida di tarifa di transporte i tambe sosten finansiero pa yuda kubri ku e pèrdida di entrada, pa asina ABC por mantené e posishon komo kompania di Transporte Públiko.

E tarifanan menshoná ta konta pa entrada riba tur konvoi di Autobusbedrijf Curaçao pa pasaheronan kuminsando for di 2 aña di edat.