WILLEMSTAD. - Manera e sifranan pa ku COVID-19 ta desaroyá positivamente aki na Kòrsou, ta krea e posibilidat pa habri Kòrsou atrobe. Esaki ta e linia kòrá ku tabatin ayera durante e relato di dia ku Minister Eugene Rhuggenaath a anunsiá ku Kòrsou ta habri, pero den un forma COVID-safe

Despues ku algun siman pasá i ku data a demostrá ku sifranan a keda abou, gobièrnu  huntu ku sektor privá ta tene eventonan piloto pa e sektor di entretenimentu i eventonan deportivo, pa por haña un mihó bista di e posibel riesgonan di kontagio.

Pa eventonan piloto di entretenimentu, ta trata evento baliabel den airu liber i den un espasio será. Pa eventonan piloto di deporte, ta trata di un evento ku un kantidat grandi di públiko, pero tur proyekto piloto mester tuma lugá den un forma COVID safe.

Mester indiká ku ainda no a disidí ken ta bai organisá kua evento baliabel. E eskoho aki lo tuma lugá den konsulta ku e sektor, Rhuggenaath a bisa.

Lo bai tin mester di vários evento pa diferente grupo, tipo di públiko i tur e proyektonan piloto ta bai tuma lugá entrante 11 di yüni benidero.

Tur otro aktividat farandulero ku no ta baliabel por keda organisá segun e protokòlnan di COVID-19 bou di kua eventonan por tuma lugá.

Ta trata di aktividatnan manera, obra di teatro, show musikal sin bailamentu.