WILLEMSTAD - Riba 13 di mart 2020 a konfirmá e promé kaso di kontagio ku e vírùs di COVID-19 na Kòrsou. Pa medio di un Dekreto Ministerial di 16 di mart 2020, Minister di Asuntunan General, basá riba e Ordenansa pa atendé ku Desaster, a dekretá Kòrsou komo zona di desaster. A base di e órden aki a determiná ku e plan nashonal pa atendé ku desaster a drenta na vigor i ku tur servisio i organisashonnan mester tuma e medidanan nesesario i mester duna total koperashon ku bista riba kombatimentu di e vírùs COVID-19.

Debí na esaki, Ministerio Públiko (OM) ta anunsiá ku basá riba e Orden Ministerial di 16 di mart 2020, a fiha un maneho pa sostené medidanan ku gobièrnu a stipulá. For di awe djabièrnè 20 di mart 2020 te próksimo aviso, Ministerio Públiko lo hiba un maneho di sero toleransia pa loke ta trata e echonan kastigabel menshoná akibou, aplikando montantenan di transakshon mas haltu. Sierto sirkunstansianan ekstraordinario i grate lo por hiba na un oumentu di e transakshon. Si no ta kumpli ku un transakshon, en prinsipio esei lo duna lugá na persekushon (kontinuá), loke ta trese kuné ku e demanda durante e kaso den Korte lo ta mas haltu.

OM ke enfatisá ku e sirkunstansianan ekstraordinario aktual ta duna lugá na sanshonnan adaptá di parti di OM i ta hala atenshon di pueblo di Kòrsou riba e nesesidat di kumpli ku e reglanan ku Gobièrnu ta dikta, manera e asina yamá ‘social distancing’.