WILLEMSTAD.- Den total 57.000 petishon pa un visa a keda entregá na Kòrsou entre 10 òktober di 2010 i fin di 2020. Den total a ninga 13.389 petishon pa un visa. Ku ta nifiká ku Kòrsou a otorgá den un periodo di kasi 10 aña 43.611 visa. Esaki ta skirbi den e rapòrt ‘Visumverlening in de Caribische delen van het Koninkrijk der Nederlanden’, ku ta un rapòrt riba otorgamentu di visa den e partinan Karibense di Reino. E rapòrt a keda deliberá den reunion di Konseho di Minister di Reino djabièrnè último. E rapòrt ta resultado di un investigashon independiente riba otorgamentu di visa den e partinan Karibense di Reino riba petishon di Konseho di Minister i riba enkargo di e ministerio di Asuntunan Interior.
Den e mesun dies aña tur e seis isla Karibense huntu a haña mas ku 180.000 petishon pa pèrmit pa visa. Den e rapòrt por lesa ku e kantidat di pèrmit pa Kòrsou, pero tambe pa otro isla Karibense di Reino Hulandes, a baha konsiderablemente for di 2015. Den e aña ei Reino Hulandes a stòp ku obligashon di visa pa abitantenan di Colombia pa henter Reino Hulandes. Den e mesun aña a kita e obligashon di pidi visa pa abitantenan di Peru ku ke bishita Aruba, Kòrsou i e islanan Boneiru, St. Eustatius i Saba. E bahada tabata basta grandi. Por ehèmpel: Den 2014 den total 23.613 persona a pidi pa un pèrmit pa drenta un di e islanan Karibense di Reino Hulandes. Den aña 2016 el a baha te 8376 persona.
Un otro aspekto remarkabel ta relashoná ku e bahada drástiko di petishon pa visa pa Sint Maarten den aña 2017 i 2018. Esaki ta konsekuensia di orkan Irma ku a dal e isla den luna di sèptèmber 2017 hopi duru. Komo konsekuensia industria di turismo a para ketu. Banda di esei for di 2020 e kantidat di petishon pa visa pa tur islanan a baha signifikante pa motibu di pandemia di COVID-19, ku tambe tin efekto basta grandi riba ekonomia di e islanan.
Banda di esei for di yanüari 2021 ta konta un obligashon di pèrmit pa tur abitantenan di Venezuela ku ke bishitá un di e islanan Karibense di Reino Hulandes.
Pa motibu di COVID-19 e aña aki no ta posibel pa biahe entre Venezuela i e islanan Karibense. Pero si e limitashon ta wòrdu kitá, por spera di un kantidat di 8000 petishon pa aña pa tur e seis islanan. Segun e rapòrt tur instansia riba e islanan mester ta prepará pa esaki.