WILLEMSTAD - Djárason último Defensa Region Karibe Hulandes a desvelá e bòrchi di nòmber di “Defensie Schietinrichting Daou” (“Instituto di Tiru Defensa Daou”).

Dunamentu di e nòmber “Defensie Schietinrichting Daou” ta reflehá e apresio i rekonosementu pa Señor Michel Daou pa su kontribushon na deporte di tiru na Kòrsou. Lamentablemente Señor Daou no por tabata presente personalmente na e seremonia di dunamentu di nòmber; su yu hòmber Amir Daou a risibí e bòrchi di nòmber den presensia di miembronan di famia i e Fundashon Daou.

Ministerie van Defensie a skohe pa hasi e gesto na un di nos deportistanan ku a destaká tantu lokal komo internashonalmente riba e nivelnan di mas haltu den mundu di deporte di tiru. Ta trata di Michel Daou tiradó di ‘Olympic Trap’ i Double Trap’. Michel a representá su pais na tres okashon di Weganan Olímpiko: na Barcelona Spaña, na Atlanta Estados Unidos i na Sydney Australia.

Tambe lokalmente Michel Daou no solamente a práktika e deporte di tiru pero tambe krea fasilidat pa por práktika e deporte di tiru.

E fasilidat di Ministerie van Defensie  ariba menshoná lo bai karga nòmber di señor Michel Daou di e siguiente forma: ‘Defensie Schietinrichting Daou’ ku Michel Daou su nòmber kompletu i su título ofishal ‘OLY’ kual a wòrdu otorgá na dje na desember 2022 dor di señora Nicole Hoevertsz, Vice Presidente di IOC. Michel Daou a risibí tambe Kondekorashon Real na desèmber 2022 for di man di su Ekselensia Señora Lucille George Wout Gobernador di Kòrsou.

E nesesidat pa èkstra fasilidatnan pa tiru pa militarnan na Kòrsou, durante último añanan a krese, pa motibu di e preshon operashonal pa hopi unidat ku tin nesesidat na treinen di tiramentu. Riba e petishon kresiente aki, den koperashon ku Fundashon Daou, a start un proyekto pa paralèl banda di e Instituto di Tiru eksistente Daou, konstruí un kancha di pistol moderno di 25 meter di largura. Sigun ta di spera e instituto nobo di tiru aki lo ta operashonal pa uso na fin di 2024.

Defensa ta antisipá pa kuminsá hasi uso di e fasilidat nobo aki, pa asina sòru pa unidatnan operashonal lo ta bon di trein.