WILLEMSTAD.- Djaluna 8 di mart a kuminsá ku entrega di ‘duplikaat-oproepingskaart’ na tur votadó ku, pa un òf otro motibu, no a risibí nan karchi di vota pa por bai vota dia 19 di mart próksimo.

Tur votadó ku no a risibí nan karchi di vota ainda, por pasa na ofisina di Kranshi na Roodeweg 42 i buska un ‘duplikaat’ di djaluna 8 di mart te ku djabièrnè 12 di mart entre 4or di atardi te ku 7or di anochi i riba djasabra 13 di mart entre 9or di mainta te ku 4or di atardi.

Den e siman di 15 pa 19  di mart por pasa na Kranshi di djaluna 15 di mart te ku djaweps 18 di mart entre 8or di mainta te ku 3or di atardi i di 4or di atardi te ku 7or di anochi i riba djabièrnè 19 di mart, dia di elekshon, por pasa buska ‘duplikaat-oproepingskaart’ for di mainta 8or te ku 6or di atardi.

Konseho Supremo Elektoral ta kere ta importante pa informá komunidat dikon no ta tur votadó ta risibí nan karchi di vota na kas. Di e 116.146 karchinan di vota ku mester a keda imprimí, un kantidat di 1756 no a ser imprimí.  Di e kantidat aki 981 e adrès no ta konosí na Kranshi, 286 persona a ‘schrijf uit’ òf a fayesé, 489  nan kas no tin number. Pa loke ta trata e personanan ku a ‘schrijf uit’ òf a fayesé tin di trese dilanti ku ta trata di personanan ku despues ku a sera e registro di votadó dia 22 di desèmber 2020 a ‘schrijf uit’ òf a fayesé entre 23 di desèmber 2020 i 1 di febrüari 2021 ku tabata e fecha riba kua a kuminsá ku imprenta di e karchinan di vota.