Elekshon SXM

WILLEMSTAD.- E dekreto nashonal pa disolvé parlamento di St. Maarten i yama e elekshon parlamentario ta publiká kaba den un edishon spesial di e “Landscourant” (”National Gazette”) di St. Maarten. Den e publikashon aki por lesa algun fecha importante relashoná ku elekshon ku ta tuma lugá 18 yüli awor.

E fecha ofisial ku a disolvé parlamento tabata 21 mei 2023 i entrega di lista di pa elekshon nobo ta 31 mei awor. Tambe ta menshoná ku e parlamento nobo lo tuma asiento 19 ougùstùs. Tabata promé minister demishonario, Luc Mercelina ku a disidí pa laga disolvé parlamento i yama elekshon nobo.

Esaki despues ku djaluna 21 mei a bira konosí ku su gabinete a kai debí ku parlamentario pa partido NOW, Kevin Maingrette a kita su sosten for di e koalishon i firma un akuerdo nobo ku partidonan National Alliance (NA) i United People’s (UP) party. Segun Mercelina e parlamentario a tuma su desishon puramente basá riba motivashonnan personal i no a tuma situashon di pais i bienestar di poblashon di St. Maarten na konsiderashon.

Esaki tabata motibu pues pa Mercelina a disidí di yama elekshon nobo pa asina pueblo di St. Maarten disidí kon ta atendé ku tipo di polítika aki. Gobernadó Ajamu Baly entretantu no solamente a firma e dekreto pa disolvé parlamento i yama elekshon, pero a informá tambe ku el a kuminsá ku su buèlta di konsulta riba formashon di un gobièrnu nobo (interino) a base di e akuerdo ku el a risibí entre NA, UP i Maingrette.

Den un komunikado di prensa emití pa partido URSM ta trese dilanti ku e partido ta bai vigilá e proseso di formashon di un gobièrnu nobo hopi di aserka. Esaki despues ku durante e proseso di formashon bou di formadó Mercelina a dal den hopi kontratempu di gobernadó Baly ku a pone e proseso tarda, sin ku tabata duna informashon na públiko di kiko ta pasando.

Tambe URSM ta kuestioná pa kiko mester forma un gobièrnu interino, kiko gastunan envolví ta, kiko e motivashon pa nombra un gabinete interino ta i si ta intenshon pa kanselá fecha di elekshon 18 yüli awor.

Foto:

...Ajamu Baly huntu ku gabinete Mercelina I...