WILLEMSTAD.- Sentronan di vakunashon WTC i SDK for di djasabra awor ta bira sistema di “walk in”, esta ku e hende por presentá na e sitio sin ningun sita pa vakuná, ta loke ku epidemiólogo sra. Iralice Jansen a duna di konosé.
Sra. Jansen a splika ku for di djasabra awor, 17 di aprel a introdusí e sistema di “walk in” na WTC i SDK. Esaki mester sosodé segun plachi di dia. Pues esnan ku no tin sita, òf tin sita mas den fin di luna di aprel, por akudí na e dos sentronan aki pa tuma nan vakuna.
Ambos lokalidat na SDK i WTC tin kapasidat pa vakuná 4500 hende pa dia. Na Sambil e kapasidat ta keda ampliá na 2500.
Na e lokalidatnan di “walk in”, lo tin tres rei, un p’esnan ku ta bai sin sita, un rei p’esnan ku sita i tambe un rei pa grandinan.
Te ainda esnan ku ta usa remedi pa hasi sanger delegá, tin di bai riba dianan djárason, djaweps i djabièrnè na Poli pa vakuná i tambe esaki mester sosodé via di sita.
Sra. Jansen a sigui bisa ku esnan ku tin di tuma e di dos dósis di vakuna na Kazèrne Marina na Parera i ta den grupo di riesgo, no mester bai Poli. Pasobra na Kazèrne Marina tin mesun struktura ku na Poli, pues tin dòkter, ambulans i enfermera na e sitio pa kualke eventualidat.
Finalmente e epidemiólogo a rekordá tur hende ku pa e di dos vakuna ku Pfizer mester akudí na Kazèrne di Marina na Parera i no na Suffisant. P’e wikènt aki, sitanan pa di dos vakuna na Kazerne Marina di djasabra 17 di aprel lo pasa pa djaluna i esnan di djadumingu 18 di aprel lo ta riba djamars.