Ermelien Pietersz a studia den un direkshon pero a skohe pa bira polis. Ermelien ta dediká na su yunan i ku atenshon tambe na loke nos hubentut den komunidat ta pasando aden. Komo un mama, polis, un dama fuerte el a konta su relashon ku su yunan i kon e ta eksperensiando ser mama.

Ermelien tin 2 yu un mucha hòmber di 11 i un mucha muhé di 5 aña. Komo polis, outoridat, Ermelien a bisa ku na kas e ta purba di tin e òrdu, e ta pruba di pone regla i struktura pero tin biaha bo tin di kambia pèchi. Riba kaya bo ta polis i bo tin di kòrda na kas bo ta mama i bo no por aktua ku outoridat manera riba kaya. E ta poko difísil i tin biaha ta su mama ta kòrd’é ku ta su yunan e ta papiando kuné i no ta riba kaya e ta komo polis.

Dia di mama pe ta algu grandi. Bo ta yòn, bira mama i haña responsabilidatnan den bida i bo ta mira ku bo mama mes ta hasi hopi pa bo. Ora bo mes ta mama ta bo bùrt di hasi loke mi mama semper a hasi pa mi i awor ami pa mi yunan. I esei ta hasié grandi pasobra semper mi ta bai bèk wak kon mi mama a hasié i balansá e ser mama.

E ta ehekutá parti di e ehèmpel ku su mama a kria nan ounke e ta purba na modernis’é un poko.

Komo mama soltero lantando dos yu, el a bisa ku e ta difísil. Komo polis e ta trata 3 e warda i e yunan tei normal na kas i bo tin di parti bo dia pa no brua e muchanan su struktura. E ta sòru pa e tei pa su yunan semper.

Trahando riba kaya komo polis, Ermelien ke ta un ehèmpel pa otronan. El a bisa Djasabra ku awor den komunidat tin hopi problema ku mayornan i yunan. E mes ta hasiendo hopi kos pa ku hóben i mamanan hopi biaha no por mas ku nan yu. Muchanan su karakter ta difísil i ònbeskòp i bo tin kai aden pa yuda e mayor i pa e hóben no bai pèrdí i ta wak e instansianan konserní pa duna guia pa e mayornan tòg tin e laso ku e yunan i siña biba ku e yunan. E mama mester por guia e yu i e yu mester aseptá e reglanan di e yunan.

Riba su dia na kas ku su yunan Ermelien a bisa e ta trata na hasi algu spesial pero hopi bia e ke sosegá. E ta plania tòg algu, bai laman ku e muchanan òf sali keiru ku nan. Mester parti e dia bon pa e sosegá i tòg hasi algu ku e muchanan. No keda sin hasié pasobra nan ta rabia, esei bo tin di sòru pa no pasa.

Mi por bisa pa pensa bon ora di bira mama. Ta prepará pasobra e bida ta difísil. Tin biaha no tin trabou, tatanan tin biaha no tei i si nan tei mes no ta duna sosten. Prepará bon i ora bo bira mama buska e ‘tools’ nan nesesario pa lanta bo yunan manera mester ta.

“Riba dia di mama mi ke pas’é ku mi yunan den dia i anochi mi ke bai un konsierto. Nos lo bai desayuná òf brunch i anochi ta pa mi”.

Mildred Mambre (wela)

Mildred Mambre, mama di Ermelien Pietersz a kalifiká su yu komo un hóben masha inteligente. Mildred tambe a lanta su yunan trahando trabou di warda esta enfermera i semper el a hasi esaki bon, envolviendo su yunan den tur loke e ta hasi. “Mi mes no por komprondé ainda kon mi a hasié. Sòru pa promé mi bai anochi sòru pa nan ta na soño. Mainta pura pura kore bini kas pasobra nan tin di bai skol i ora nan bai skol mi por bai drumi un ratu”.

E ta sigui bisando “Mi a siña mi yunan ku trabou no ta nada malu. Nan tin di hasi nan bèst i ora nan bai skol siña pa mañan bo ta bon. Na kas nan tur tabatin nan tareanan pa kumpli kuné. Nan tabata mira kon mi ta traha i mi ta sòru tòg pa nan hasi tur kos i asta sali ku nan”.

Mildred no a kere ku e lo a haña un yu ku lo bira polis. Nan tata tabata polis i Ermelien a bai Ulanda bai studia pero e no a gusta su trabou. Na Ulanda el a solisitá pa polis i tabata kla pa kuminsá pero direpente el a mira ku na Kòrsou ta buska polis i mesora el a apliká i el a bin Kòrsou. Mildred ku tambe tabata na Ulanda a hañ’é tambe ta bin Kòrsou pa ta ku e yunan.

E tabata disipliná su yunan mustrando nan kon aktua ku otro. Ermelien tabata mas chikí i e otro dos yunan mas grandi. Pero Ermelien tabata masha inteligente i tabata yuda su rumannan. E ta kòrda kon e yu hòmber mas grandi tabata peña esun chikí ora e mama ta na trabou i asta nan mes ta kushina i yuda nan kurpa.

Mildred ta sumamente orguyoso di su yunan. Ora bo tin yu nan no ta di bo, pero awor nan ta demostrá ku loke bo a siña nan nan ta hasié na kas. I esei ta un orguyo pa Mildred. Pa Mildred ta importante pa su yunan demostr’é tur dia ku e ta mama i no warda pa e dia di mama yega pa bis’é i demostrá esaki.