WILLEMSTAD.-EXTRA ta trahando duru i ku hopi animo pa trese un website renobá, mas moderno i ku ta brinda mas fasilidat na e usuario. Pa mas ku 40 aña korant EXTRA tin un tim di hende dediká pa tur dia produsí un korant serio i konfiabel. Meskos ta konta pa nos website i página di Facebook i YouTube.

Lamentablemente den e esfuersonan di renobashon di e website e sistema a brua nòmbernan similar ku e fotonan korespondiente, ku otro palabra e sistema a kue por ehèmpel e nòmber Pedro i a konektá esei ku un foto ku tambe yama Pedro. E problema ta ku kada Pedro ta diferente i esei e sistema a konfundí. EXTRA ta pidi diskulpa na kualke persona òf famia unda esaki por tabata e kaso i posibel molèster ku e situashon por a krea. Otro problema ku nos a konstatá ta ku e sistema a manda diferente ‘newsletter’ pa mesun persona. Tin persona ku a haña gran kantidat di mail konteniendo e ‘newsletter’.

EXTRA ku e profeshonalnan ku ta atendiendo e sistema digital ta trahando duru pa eliminá tur posibel fayonan den e sistema i un bia mas nos ta ofresé nos diskulpa.