WILLEMSTAD.- “Mi a yama prensa pa splika ku mi ta rabiá. Rabiá, pasobra ta makamba ku ta kore ku yu di Kòrsou inosente ku no ta hasi nada malu. Pa kolmo nan ta sera parti di kosta, sin pèrmit. Korte a ordená un stòp di e konstrukshon, pero nan a sigui konstruí. Despues nan a entregá nan pèrmit, pa haña un pèrmit nobo den 8 dia, ku ta hopi lihé. Na mi opinion esaki ta un prueba ku lei no ta konta pa tur hende.” Asina siudadano Hans Stadt a bisa EXTRA.

El a purba di papia ku Suzy Camelia-Römer pa dos aña kaba, ku tabata minister di Tráfiko, Transporte i Planifikashon Urbano.  E tabata responsabel pa e pèrmit ku su ministerio a duna pa konstrukshon kontra reglanan di EOP. Despues a bira konosí ku e tereno ta riba nòmber di Pais Kòrsou. “Na mi opinion sra. Camelia-Römer mester a tuma akshon. Pero semper el a keda hopi leu for di e kaso aki.”

Stadt a splika ku e no tin pasenshi mas. “Si mi bisiñanan a konstruí un kas ilegal i tambe un pisina riba tereno ku ta di Pais Kòrsou, mi ke invitá henter pueblo di Kòrsou pa disfrutá di e kosta di playa na Pietermaai i tambe pa landa den e ‘pool’.”