WILLEMSTAD.- E medidanan ku a ser anunsiá ayera atrobe ta pa falta di nos komunidat mes, esaki segun Hefe di Departamento di Inspekshon Ekonómiko Ronny Cornelis.

Cornelis a indiká ku ya pa kasi 1 aña ta teniendo kontrol rònt Kòrsou i konstantemente ta keda ripití e medidanan i tambe konsekuensia pa esnan ku faya. Pero últimamente a bira mané ku komunidat no ta preokupá mas.

Sifranan a baha i tur hende a ranka kibra i kuminsá hasi di mas. No ta usa tapa boka mas, no ta desinfektá man i no ta kumpli ku distansia sosial. Na hopi establesimentu ta organisá aktividatnan ku tokamentu i bailamentu sin respetá e medidanan. Konsekuensia di tur esakinan ta ku sifranan a bolbe subi drástikamente, ku konsekuensia ku mester a re-introduí algun medida, ku ya tabat’ei.

Djasabra a kontrolá 11 establesimentu di kual na 9 a parti prosèsverbal debí ku trahadónan tabata laborá sin tapaboka bistí.

Mayoria di e establesimentunan ta trùk di pan i tambe snèk i bar. Na 1 establesimentu mester a redusí e kantidat di kliente pa asina e negoshi por a sigui operá.

Djadumingu a kontrolá 6 establesimentu di kual 5 a haña prosèsverbal pa trahadónan ku no tabatin tapaboka bistí, miéntras 1 establesimentu a keda será pa aglomerashon i lógikamente a para e aktividat.

Komunidat mester realisá ku mundu kompletu ta bibando den un normal nobo. Tanten ku komunidat no duna di su banda i kumpli ku tur medida, nos ta sigui haña nos den e problemanan aki, Cornelis a finalisá bisando.