KRALENDIJK – E ta notabel e promé simannan di e aña akí den algun supermerkado na Boneiru. Partikularmente e rèkinan di Van den Tweel Supermarket ta blo bashí. Esaki a hala atenshon di diferente konsumidó ku ta puntrando kiko ta pasando. E problema ta, ku a surgi problema ku diferente barku ku mester trese kònteiner Boneiru. Diferente barku a daña den luna di desèmber, asina Koen Lenders, gerente suplente di Van den Tweel Supermarket, ta konfirmá na BONERIANO, loke a afektá suministro di merkansia na nos isla i kousa un eskases notabel di produkto den e rèkinan.

 

Rèki bashí

Ku e rèkinan ta bashí e último simannan ta kuadra, Lensen ta bisa. Den luna di desèmber diferente barku di kònteiner a daña i esaki a sòru pa un tardansa di suministro di kònteiner i a sòru pa eskases di diferente produkto. Ounke tin eskases di generalmente tur produkto, partikularmente e sekshon di berdura, fruta, kuki etc. a keda afektá ekstremadamente.

No ta Van den Tweel so a keda afektá pa e tardansa den entrega di kònteiner na Boneiru, segun Lensen. Lensen: “e ta konta sigur pa Warehouse tambe i probablemente pa Bondigro tambe, ounke mi no ta riska bisa esei ku tur probabilidat.”

 

Chinesnan tambe

BONERIANO pa siguridat a konsultá tambe ku e gremio chines di supermerkado. Nan tambe a sinti efekto bèrdat di e tardansa di kònteiner pa Boneiru den luna di desèmber.

“Den desèmber si nos tabatin problema ku suminstro di kònteiner”, Xuwen Cen di Wingcheung Supermarket na Antriol ta bisa. Pero den yanüari ya e situashon a normalisá pa e supermerkado. Den desèmber tabatin problema ku kònteiner for di Hulanda. Pero esei a keda solushoná i nan kònteinernan a yega kaba entre tantu.

 

Solushoná

Entretantu e barkunan ku kònteiner pa entre otro Van den Tweel a yega Kòrsou for di djadumingu. Na e momentunan akí tin 6 kònteiner di e supermerkado pará na Kòrsou. “Asina ku nan yega Boneiru nos ta bai traha duru pa sòru ku nos             rèkinan ta yená atrobe”, Lensen ta sigurá. E supermerkado ta spera ku fin di e siman akí òf en todo kaso komienso di otro siman, nan lo ta kompletamente suministrá atrobe.

LAGA UN KOMENTARIO

Please enter your comment!
Please enter your name here