DEN HAAG/W’STAD.- Residentenan di Islanan-BES ku a pèrdè trabou komo konsekuensia di Coronavirus, ku no tin sufisiente medionan finansiero pa mantené nan mes i ku no a biba durante sinku aña sin interupshon riba un dje islanan aki, lo tin di regresá nan pais di orígen. Esei EXTRA por a konstatá for di un karta ku gobièrnu di Reino a emití resientemente.

E karta ta dirigí su mes na personanan ku no ta oriundo dje islanan i ku n’e momentunan aki ainda ta risibiendo un kompensashon òf supsidio pa motibu di COVID-19 for di e fondo di emergensia. Den e mesun rosea e karta ta informá ku e kompensashon en kuestion lo stòp pa 1e di yanüari 2021. Pues e grupo aki lo por spera nan último pago pa fin di desèmber 2020.

Dikon ta stòp e kompensashon?

E karta ta splika ku, dia 9 di òktober 2020 a anunsiá e di tres fase dje areglo di emergensia. I den e reglanan nobo ta duna di konosé ku e trahadónan en kuestion lo por hasi apelashon riba e areglo aki durante un máksimo di tres luna. Pa e kasonan aktual esaki ta drenta na vigor pa 1e di yanüari 2021.

Esei ta nifiká ku, na momentu ku yega 1e di yanüari 2021 i un trahadó ku a risibí e kompensashon durante tres luna òf mas kaba, lo no tin derecho mas di risibí e sèn.

Kiko e persona por hasi?

E punto di salida ta ku e persona mes mester buska un otro trabou. E unidat di RCN den e Departamento di Asuntunan Sosial lo por yuda den esaki i lo por pidi pa intermediá. Asina leu ku e persona ta hasi uso dje areglo aki e ta obligá di koperá den esaki.

Den kaso ku no ta posibel pa haña un otro trabou, kisas e persona lo por bini na remarke pa ònderstant. Esaki ta un kontribushon ku Gobièrnu di Reino ta duna komo un sosten pa residentenan den Karibe Hulandes ku no tin entrada.

E persona ku ke bini na remarke pa ònderstant mester tin 18 aña òf mas i ta bibando pa por lo ménos 5 aña sin interupshon riba un dje islanan.

Si e persona no a biba pa 5 aña sin interupshon riba un dje islanan, kiko awor?

Si e persona no tin sufisiente plaka pa por mantené su mes i e no ta bibando pa sinku aña riba un dje islanan-BES, legalmente ta nifiká ku su derechi riba estadia ta terminá. E sistema di seguridat sosial riba Islanan-BES no ta kubri e tipo di kasonan aki tampoko.

Den situashonnan eksepshonal lo por hasi apelashon riba ònderstant. E lo por ta posibel p.e. si e fronteranan òf espasio aéreo pa yega e pais di orígen ta será, kual ta hasi ku e no por regresá. Den un kaso asina lo tin di tene kontakto ku e unidat di RCN na Departamento di Asuntunan Sosial.