Un Notam a drenta

A sera espasio aéreo te desèmber 2019

WILLEMSTAD.- E informashon ku a sera espasio aéreo entre Venezuela ku Kòrsou, Aruba i Boneiru ta un realidat. Un ratu pasá a drenta na Air Traffic Control di Kòrsou un asina yamá NOTAM, Notice to Airmen. Den esaki outoridatnan di aviashon di Venezuela ta informá ku a sera espasio aéreo te próksimo aviso. Esei e direktor sra. Micilia Albertus-Verboom a konfirmá pa EXTRA.

E Notam a drenta algu promé ku 3’or di atardi, loke ta nifiká ku Venezuela no ta tuma niun avion ku sali di Kòrsou, Aruba i Boneiru pa nan teritorio i den mesun rosea niun avion ku plan di buelo pa yega un di e islanan ABC no ta permití pa lanta buelo.

Segun sra. Albertus-Verboom, nan ta komprondé ku for di despues di 12’or di mèrdia Venezuela a stòp di tuma avion. Mas aleu el a splika ku semper avionnan por desviá pa sigui nan ruta ounke ku esei ta sali nan mas kostoso. Ta keda na kada kompania di aviashon kua direkshon nan ke bai.

Manera EXTRA a informá anteriormente, promé ku kada avion sali for di kualke aeropuerto rònt mundu e mester saka un plan di vuelo. E plan di vuelo ei ta bai pa e tur espasio aéreo ku e avion ei ta bai pasa den dje. Un avion ku lanta di Kòrsou pa bai Venezuela, e plan di buelo mester bai pa Kòrsou i pa Venezuela. Den kaso ku e avion ta bai Merka, ta asina ku Kòrsou mester haña e plan di buelo, meskos Sto. Domingo i tur otro espasio aéreo ku e avion ei mester pasa den dje Promé ku e yega Merka.

Den e kaso aki si Venezuela no ke pa e avion ei drenta su espasio aéreo nan mester saka un Notam. Por tin kaso ku un kompania di avion tin debe i e pais no ke pa e kompania ei su avionnan pasa den nan espasio aéreo, den tal kaso e kontrol di tráfiko di Maiquetia ta informá ku e avion ei no por drenta nan espasio aéreo.