WILLEMSTAD.- Ayera mainta funshonarionan di inspekshon di seguridat, MEO i tambe  Brantwer a bai na un establesimentu na Palu Blanku.

Esaki despues di a tuma nota di algun konstrukshon ku a tuma lugá. Na nan yegada na e sitio a tuma nota di konstrukshonnan ku a traha aserka, sin e pèrmitnan nesesario. Aparte di esaki nan no ta kumpli ku normanan di seguridat, tantu pa bishitante komo personal.

Huntu ku esaki no tin un aparato di paga kandela ku ta traha i tin konekshonnan di gas ta kore banda di koriente. E funshonarionan a indiká na esnan responsabel ku esakinan simplemente no por. Tur komersiante tin e responsabilidat di operá su lugá kumpliendo ku tur norma di seguridat pa tur esnan presente.

Mirando esakinan a sera e establesimentu te ku un próksimo aviso.