WILLEMSTAD.- Establesimentunan, den e kaso aki minimarketnan no por kontrolá ku tòg tin hende ta para konsumí bebida alkohóliko na e lokalidat. Esaki ta trese kuné ku nan ta haña un atvertensia na momentu ku e Tim Multidisiplinario kore yega na e sitio.
Riba djaluna 10 mei 2021, e tim a tene su kontròlnan rutinario na 16 establesimentu. Di e kantidat di 16 establesimentu, dos (2) tabata na òrdu, a duna 8 un aviso, 7 a haña un but i a sera un negoshi.
Un bar/restorant na Andres Belloweg a risibí un aviso pasobra no a duna servisio di entregá kos na outo.
Otro bar/restorant na Breedestraat a risibí un aviso pa laga kliente para konsumí na e lokalidat; mesun infrakshon un toko na Californiaweg a kometé; esaki ta konta tambe pa minimarket i panaderia na Juan Hatoweg, minimarket na Jan Noorduynweg ku tambe tabata bende produkto via bentana, minimarket na F.D. Rooseveltweg.
Na un minimarket na Kaya Monagas a risibí aviso pa aglomerashon.
E tim ta kontrolá establesimentunan riba nan dokumentonan si esakinan ta na òrdu. Na un establesimentu riba Seru Fortunaweg Nst a haña un aviso pa aktualisá e pèrmit di Kámara di Komersio. A duna e propietario espasio pa atendé esaki.
Un trùk di pan na Onverwacht a haña un but pa ku orario di sera. Otro lugá di kuminda riba F.D. Roooseveltweg, e tim a repartí 3 but pa tapaboka.
Un Minimarket na Kaya Dr. Gungu Maal ta otro negoshi ku a haña but pa tapaboka.
Snèk na Winston Churchillweg a haña but, despues di tabatin un aviso pa laga hende para pidi kos na bentana. E hende tin di keda sinta den outo i na outo ta tuma pedido i entregá esaki na outo.
Otro snèk na Trai Seru a haña un but pa orario di sera.
Finalmente un pakus den Breedestraat Otrobanda a keda sera pa motibu di no ta disponé di un pèrmit Ekonómiko.