WILLEMSTAD.- Vários establesimentu, spesialmente esnan di kuminda, ta keda entregá kuminda na outo pará dilanti dje establesimentu. Manera ta konosí un dje reglanan di e medidanan ku gobièrnu a entamá for di fin di mart relashoná ku subida di COVID-19 ta ku ta entrega na kas so por tuma lugá. No por entregá kuminda na outo pará dilanti dje establesimentu. Den e relahamentu di medidanan djárason último, 21 di aprel, ta solamente negoshinan ku tin “drive thru” por hasi uso di esaki.
Djárason e Tim Multidisiplinario formá pa MEO, UBW/KPC a bishitá alrededor di 16 establesimentu.
E tim a atendé ku bendementu di piská den área di Veeris. A avisá e bendedó pa e tene kuenta ku e orario di operashon.
Na Yong Lie Minimarket, e propietario a risibí but pa tapaboka. Tambe a instruí e propietario pa kita tur fasilidat pa sinta na e establesimentu.
Na un otro establesimentu tambe e propietario a risibí but pa tapaboka
Ming Fa Minimarket a risibí but pa ta laga klientenan para konsumí na e sitio.
Na Haoyuan Prince Bar Restaurant B.V., e tim a duna un aviso verbal, despues di a konstatá ku nan ta hasiendo uso di e servisio di “curbside pick up”, esta entregá kuminda na outo. A instruí e propietario pa hasi uso di solamente “delivery” (entrega na kas).
Na Panaderia & Restaurante Latina Guede a risibí aviso verbal pa ta hasiendo uso di e servisio di “pick up”. Aki tambe a instruí e propietario pa hasi solamente uso di e servisio di entrega na kas.
Lekkerding ta otro establesimentu ku a risibí aviso verbal pa ta hasiendo uso di e servisio di entrega na outo dilanti dje establesimentu. Esaki despues ku a konstatá kliente ta bin tuma nan pedido. Aki atrobe e tim a instruí e propietario pa hasi uso solamente di e servisio di entrega na kas.
Na Caribe Supermarket B.V. a duna un aviso pa apliká e protokòl higiéniko konforme regla pasombra e mashin di handsanitizer na porta no ta funshoná debidamente y tampoko no ta limpia e garoshinan korektamente.
Starbucks tambe a haña un aviso pa uso di "curbside pick up" en bes di entrega. A instruí e persona responsabel pa stòp mesora, i praktiká solamente entrega. Banda di esaki tambe a bishitá algun supermerkado.
Pues por mira ku no ta tur negoshi tin e posibilidat pa por hasi entrega na kas òf negoshi.