WILLEMSTAD.- Loke ta mira ku a sali riba vidionan últimamente ta duna un bista di e estado di mantenshon di e edifisionan di ántes St Elisabeth Hospitaal (Sehos). E vidionan ta duna sinembargo un bista hopi unilateral. Mester tene kuenta tambe ku e estado tékniko di e konstrukshon.

“Ekspertonan ta konkluí ku e edifisio ta sólido i ku e lo no haña sker fásil.” Asina presidente di e direktiva di St. Elisabeth Foundation, Anthon Casperson ta trese dilanti den e podcast ‘3’or ku Gino’ riba plataforma digital di EXTRA. Ora ta asina leu ku ta bai renobá e edifisio ta bai strep e edifisio kompletu, saka tur bentana i kosnan kibra.

Loke si ta tene kuenta kuné ta aspektonan históriko manera “bentananan “glas in lood”, Casperson ta splika. Obispado pidi direktiva di e fundashon e pa mantené e karakter históriko i katóliko di e edifisio mas tantu posibel, mantené e kapèl i pa duna Mgr Ferdinand Kieckens, ku ta derá riba tereno, un graf ku ta digno.

E fundashon a buska un grupo ku por buska e kapital i ta komprondé importansia di e edifisio monumental. “Na Hulanda ta 5 pa 6 grupo tin ku por hasi esaki.” SEF tabatin kontrato ku e grupo hulandes Schonk, Schul & Compagnie, pero ora e fundashon a kai den posponementu di pago e grupo a kambia e kontrato. SEF no a gusta esaki i a kibra e kontrato, loke a lidia na un kasonan en korte ku e grupo no a gana.

Entretantu tin un otro grupo desaroyadó ku ta bai traha riba e plannan ku tin riba mesa, esta ku ta strep e edifisio, kambia funshon di e edifisio, hasi esaki mas aksesibel pa públiko i kumpli ku statutonan nobo di SEF. E meta di e fundashon a kambia di manehá un instituto hospitalario den maneho di hendenan grandi. Ke realisá ku hendenan grandi, ku mester di kuido i asta ku a kuminsá sufri di pèrdida di memoria por biba den un ambiente sigur huntu ku esnan ku ta duna nan kuido.

“Ke hasi esaki komo un ehèmpel pa Kòrsou i mustra kon por atendé ku bibienda pa hende grandi. Ke logra e tipo di bibiendanan aki tantu na Bándariba, kaminda hospital tabata i na Bándabou. Ke mustra ku por trese Kambio den e estilo di bida pa hende grandi ku konosé kaminda grandinan ta biba di kasnan di kuido nan 10 den un kamber.”

Mas aleu Casperson ta indiká ku SEF tin kontakto di aserka ku universidat na Groningen ku ta e úniko universidat na Hulanda na nivel sientífiko ta hasi investigashon riba hendenan grandi. Den e plannan di renobashon di loke ántes tabata e hospital ta bai pone espasio pa ofisina kaminda studiantenan di universidat di Groningen ta bini Kòrsou a base di interkambio i ta hasi parti di nan investigashon na Kòrsou.

Mas serka di CMC ta bai traha alabes un hotèl di kuido chikí ku lo tin 2 funshonalidat. Ora pashèntnan bini for di por ehèmpel Aruba òf Boneiru, nan tin un kaminda pa keda ku nan famia, serka di hòspital. Despues di operashon tambe nan por keda algun dia na e hotèl promé ku nan kue buelo bai kas bèk. E otro funshonalidat pa e hotèl di kuido ta pa ora tin kalamidat manera a pasa ku e pandemia di Covid-19.

Por kombertí e hotèl den un espasio pa pone 100 kama èkstra di hòspital. “Esaki ta algu ku mester papia promé ku gobièrnu i CMC pa nan bai di akuerdo kuné.” Tambe den e plannan di renobashon tin lugá pa horeca. Tambe lo habri un kaminda di Pater Eeuwensweg bai Breedestraat, loke lo hasi e propiedat mas aksesibel pa pueblo

Mas aleu lo trese bèk tur e pida pida kuránan ku a traha ántes. Ta kita tur e edifisionan ku a traha despues di tempu den kuadro di “inbreiding” di e hospital i asina eksponé tur e kuránan aki. Asta den e plannan tin pone pa traha 2 pisina pa grandinan.

Ántes, Casperson ta finalisá bisando, tabatin pos riba e tereno i lo trese esakinan bèk pa usa e awa pa mantené e kuránan despues ku filtra e awa  ku instalashonnan “reverse osmosis”. Tambe a hasi investigashon pa hasi e edifisio mas neutral posibel den uso di energia.

Foto: