WILLEMSTAD.- Minister di Hustisia demishonario mr. Quincy Girigorie no ta konsiderá kumpramentu di outo, kumpramentu di arma, chaleko anti-bala i otro materialnan komo privilegio pa e polis, sino un deber di e titular di hustisia. Por sierto, e tipo di gastunan aki ta kosnan ku mester ta normal i ku mester sali for di presupuesto di gobièrnu. I el a haña ku ta un bèrgwensa ku e biaha aki mester a kumpra material pa polis for di e Fondo di Kriminalidat. Asina e mandatario a duna di konosé na EXTRA den un entrevista e siman aki. Pues e tipo di kosnan aki e no ta konsiderá komo logro den su periodo di kuater aña, sino deber ku e mester a kumpli kuné.

Loke di otro banda e ta kontentu kuné ta e echo ku ta hasi invershonnan pa a sigui ku e skol di polis. A hasi un invershon di alrededor di 2 mion florin den esaki for di Fondo di Kriminalidat i por bisa ku skol di polis ta bèk den su lokalidat. Dje manera aki ta focus pa e kalidat dje polis ta bèk manera e mester ta.

Mas aleu sr. Girigorie a duna di konosé ku lo bai kuminsá ku un estudio di “Bachelor Policing”. A firma un protokòl for di aña pasá ku University of Curaçao pa organisá e estudio aki ku ta pa un nivel mas haltu den e kuerpo. Esaki ta un proyekto ku pronto lo kuminsá. E mandatario a aklará ku e estudio i proyekto aki no ta esun rònt di kua tabatin hopi diskushon algun tempu pasá. Defakto por bisa ku e proyekto aki a start kaba pa medio di kursonan individual, pero e estudio mes lo kuminsá na luna di ougùstùs próksimo. Tin fondonan pone disponibel kaba, tin palabrashonnan hasí, dokumentonan firmá.

Loke UoC ta bai hasi ta un estudio rekonosé dor di NIVRA ku a bin Kòrsou kaba pa hasi e inspekshonnan nesesario, tin e infrastruktura kaba.

Segun sr. Girigorie, ta trata aki di un estudio nesesario, pasobra tin un parti dje kuerpo ku tin mester di mas formashon i kapasitashon, i esaki ta bai bira posibel dor di e estudio.

Kondishon pa bira polis:

Den KPC mes por bisa ku atraves di tempu a trese adaptashon den e kondishonnan i sirkunstansianan di trabou dje polis. E filosofia ta ku mester tin disiplina internamente, i dje forma ei e ta reflehá pafó tambe. Pues por konsiderá esaki komo un proseso di reorganisashon i fortifikashon interno.

Por bisa ku “integridat” tambe a bira un tema riba su mes den e kuerpo. Dor di esaki por nota ku tin biaha sierto polisnan ta kai. Pero esei ta pa motibu ku e kuerpo mes ta saniando su mes. Ta importante pa limpia un organisashon manera KPC.