WILLEMSTAD.- Djaluna último e estudio di ‘Basis Opleiding Kustwacht’ (BOK) pa 2021 a start. BOK ta un estudio ku ta dura 1 aña konsistiendo di módulonan práktiko i teorétiko, inkluso e estudio di ‘Buitengewone Agent van de Politie’ (BAVPOL). E aña aki Wardakosta su estudio di BOK a kuminsá ku 22 hóben di Aruba, Kòrsou i St. Maarten. Tur tin e ambishon pa bira un agente di Wardakosta pa asina yuda protehá nan pais.

For di djaluna e aspirantenan di BOK a kuminsá na e periodo di introdukshon, e asina yama ‘SamenSterk periode’ den kual nan lo ser retá mentalmente i físikamente. E estudio ta start ku e parti pa sera konosí ku e instruktornan di BOK i un tèst pa midi e hóbennan físikamente. A base di e tèst físiko akí e instruktor lo traha un programa di entrenamentu pa e aspirante. E meta di e periodo di ‘SamenSterk’ ta pa e aspirante krese mentalmente i físikamente i sera konosí ku e organisashon di Wardakosta.

For di e aña akí e estudio lo tuma lugá na e base militar na Suffisant kual tin un kampamentu speshal pa entrenamentu di hóbennan. Wardakosta ta deseá tur 22 hóben éksito den e aña binidero.