Estudio ta revelá ku ainda tin un persepshon robes, esta ku tur produkto di tabako ta mesun dañino. Tabako kimá manera ta e kaso di sigaria tradishonal, ta esun di mas peligroso.

...Un estudio kondusí pa Rutgers University na Merka ta revelá ku 70% di dòkternan a reportá ku nan pashèntnan adulto ku ta huma, a puntra nan tokante sigarianan elektróniko i otro produktonan ku ta liber di huma, komprobando ku tin un interes grandi pa mihó alternativanan pa e sigaria tradishonal. Un tersera parti di e dòkternan a bisa tambe ku nan pashèntnan a puntra esaki den e delaster 30 dianan.

Estudio

Den e kuadro aki nos a papia ku Yocasta Gil mènedjer sientífiko pa Philip Morris International i el a duna algun detaye di e estudio ya menshoná. Ta un estudio realisá pa un universidat di prestigio esta Rutgers University i e a hib’e komo punto di focus pa e pashèntnan ku  ta pidi nan dòkternan durante di konsulta, na momentu ku nan no ke stòp di huma pero nan ke otro opshon. Esei a sosodé den diferente klínika na Merka. Dado momentu den e estudio ta sali na kla ku 70% di e dòkternan ta indiká ku humadónan adulto ta  puntra alternativa liber di huma. Tin interes di e pueblo pa konosé e produktonan aki.

Alternativa

Dr Gil a bisa ku un terser parti di e dòkternan tambe a bisa ku e pashèntnan a puntra di e alternativanan aki durante  e luna promé ku nan tabat’ei. Tambe ta importante pa menshoná ku a sali for di e estudio aki ku hopi dòkter no ta komprondé e diferensia entre e alternativanan no kombustibel den término di redukshon di daño kompará ku sigaria. 60% di dòkternan no konosé e evidensia ku tin tras di e produktonan liber di kombustion, pa ofresé na e humadónan adulto ku di tur forma ta bai sigui huma.

Eduká e dòkter

Ta importante pa inkluí e parti di edukashon di e dòkternan. Esei ta sali for di e punto di bista sientífiko di PMI pa e dòkternan sa, ku ta eksistí alternativa i e evidensia ku ta eksistí pa e personanan ku tòg ta bai sigui huma i tin diferensia robusto di e produktonan liber di huma i ta netamente pe esnan ku ta bai sigui huma.

Komunidat médiko

Dòkter Gil a sigui bisa ku pa nan ta masha importante e aserkamentu di e akademia, institushonnan ku ta efektuá e tipo di investigashonnan aki ku e komunidat médiko. Tambe pa por papia di nan den konferensianan médiko di forma di un pa un, manera PMI ta hasiendo pa último añanan i asina informá e sektor médiko. Ta eksistí diferente konferensia ku ta papia di e temanan aki i vários dòkter ta asistí na nan i via di e kaminda aki e estudionan sientífiko por yega na e komunidat médiko.

Benefisio

Relashoná ku e kantidat di persona ku tabata usa sigaria normal kambia pa esnan di sistema elektróniko, dòkter Gil a splika ku tin 24 mion persona ku a kambia pa e alternativanan liber di kombustion. Pero tin hopi hende a kambia tambe pa sigaria elektróniko ku tambe ta esnan sin kombustion i nan tambe tin ménos daño pa salu di e persona ku ta sigui huma. Tin pais manera Reino Uní, New Zeeland, Gresia i Hapon ku tin maneho establesé ku e produktonan liber di kombustion aki i pa e persona ku ta bai sigui huma tin akseso na e informashonnan i na e alternativanan. Esaki segun dòkter Gil i ta representá un benefisio na e komunidat ku ta bai sigui huma. Den e paisnan menshoná dòkter Gil a bisa ku asta nan a nota e benefishinan.

Persepshon robes

I apesar di tur e trabounan ku PMI ta hasi mundialmente, e persepshon ainda ta eksistí ku tur produkto di tabako ta dañino. Segun dòkter Gil ta un persepshon di hopi tempu pero importante ta pa e poblashon komprondé ku no ta e tabako ta hasi daño, pero ora kima esaki. Ora e kima e ta generá huma i den e huma tin toksinanan ku ta asosiá na enfermedatnan manera pulmon, kanser, kurason. Loke ta dañino ta e kombustion ku e tabako ta generá ora e kima. I mester hasi e diferensia. E produktonan liber di kombustion ta entregá nikotina na un manera similar ku ora konsumí sigaria i mas serka di e ritual ku ta importante ora e humadó us’é pero no tin kombustion i no tin (95%) supstansianan toksiko den e huma. E sistema elektróniko di tabako tin unidatnan elaborá di tabako natural i atraves di sistema sofistiká di kalentamentu e ta sòru pa nunka e ta yega na kombustion i e usuario por usa nikotina pero ku redukshon grandi di e supstansia dañino.

Konsientisá

E estudio ku Rutger University a hasi, ta sirbi komo vehíkulo pa konsientisá dòkternan pa duna informashon na e pashènt ku ta presentá i ke un alternativa pa huma, ya ku nan no ta bai stòp di huma. E evidensia  a mustra ku e produktonan sin kombustion ta potensialmente mas efektivo pa e persona ku no ke stòp di huma. Ideal ta pa e persona stòp di huma segun dòkter Gil. Pero pa e persona tin akseso i informashon di e produktonan liber di kombustion ta importante pa e dòkter ku ta di nan konfiansa, pa sa kua alternativa tin i e dòkter tin e hèrmèntnan for di e punto di bista sientífiko por kontestá e pashènt kua alternativa ta mihó pe. E dòkternan mester konosé ku e produktonan aki ta diferente na e sigaria konvenshonal.

Investigashon

E revista The Journal of The American Medical Association, un di e revistanan sientífiko mas prinsipal i popular na mundu, a publiká e estudio. Di akuerdo ku e estudio, ta konsiderablemente mas probabel ku dòkternan ta rekomendá e sigarianan elektróniko na personanan ku ta huma pisá, miéntras ku nan ta rekomendá medisinanan aprobá pa FDA, manera bals di nikotina, na personanan ku ta huma ‘de bes en kuando’.

E outor di e estudio Michael Steinberg, direktor médiko di e Rutgers Tobacco Dependence Program na e Center for Tobacco Studies i Jefe di e Departamento di Medisina na e Rutgers Robert Wood Johnson Medical School, ta bisa ku “segun e evidensia, ku ta demostrá ku sigarianan elektróniko ta potensialmente efektivo pa stòp di huma, ta krese, nan por hunga un ròl importante den redukshon di uso di sigaria i konsekuentemente malesanan kousá pa tabako. Ta importante pa komprondé e perspektivanan di dòkternan tokante sigaria elektróniko komo medio pa redukshon di daño.”

E resultadonan di e investigashon ta sugirí ku miéntras mas dòkternan komprondé ku no ta tur produkto di tabako ta mesun dañino, mas probabilidat tin ku nan lo rekomendá sigarianan elektróniko òf otro produktonan liber di huma na personanan ku ta buskando pa stòp di huma òf ku ta bou di tratamentu pa malesanan kousá pa tabako.

Kimamentu, e kousa prinsipal di daño

Riba e dia ofisial di e komunikado di prensa di e estudio, Cristine Delnevo, outor prinsipal i direktor di Rutgers’ Center for Tobacco Studies na e Rutgers School of Public Health, a bisa ku “ta hopi importante pa trata ku e persepshonnan robes di e dòkternan i eduká nan, en partikular korigiendo e persepshon robes ku nan tin, di ku tur produkto di tabako ta mesun dañino.

Awendia tin produktonan liber di huma ku ta sientífikamente probá di ta mihó opshon ku sigui huma, ya ku, kontrali na e sigaria tradishonal, nan ta eliminá e proseso di kimamentu, kual ta e kousa prinsipal di daño ligá na humamentu. Den e último añanan, a desaroyá produktonan alternativo pa sigaria, manera sigarianan elektróniko i produktonan di tabako kentá, dirigí riba e personanan ku di otro manera lo sigui di huma.

Pa mas detaye tokante e estudio: Communication Between US Physicians and Patients Regarding Electronic Cigarette Use | Lifestyle Behaviors | JAMA Network Open | JAMA Network and Many Physicians Have Misconceptions About E-Cigarettes | Rutgers University

(Papiamentu: Komunikashon Entre Dòkter i Pashèntnan di Estádos Unídos Tokante Uso di Sigaria Elektróniko| Komportashonnan di Estilo di bida | JAMA Network Open | JAMA Network i Hopi Dòkter tin Persepshonnan robes Tokante Sigarianan Elektróniko | Rutgers University)